HIGHLY urbanized ang dakbayan sa Lapu-Lapu busa dili kini mahisama sa isla sa Boracay nga gisirad-an sa mga turista sud sa unom ka buwan sugod karong Abril 26 tungod sa kahugaw na sa kanhi mala-paraisong isla sa kasadpang Kabisay-an.
Kini ang reaksiyon ni Mayor Paz Radaza nunot sa hugonhugon nga isunod ang Lapu-Lapu nga nabaniog sa daghang ‘world-class resorts’ ug destinasyon usab sa mga lokal ug langyaw nga turista.
Lakip sa isyu sa mga istraktura sa baybayon, si Radaza niingon nga may kalahian sa Boracay tungod sa pagka highly urbanized sa dakbayan, diin 3-meter lang gikan sa shoreline.
Hinuon, si Radaza nagtukod og monitoring team aron pagseguro nga dili mahisama sa Boracay.
Ang team gilangkoban sa City Health Office (CHO), City Environment and Natural Resources Office (Cenro), City Engineering Office (CEO), City Tourism Office (CTO) ug City Council.
Si Hembler Mendoza, pangulo sa CTO, niingon nga ang team mosusi sa mga beach resort bahin sa pagpatuman sa kalimpiyo ug pagkuha og sample sa dagat aron pagseguro nga walay coliform bacteria o hagaw gikan sa hugaw sa tawo.
“So far, negative (coliform bacteria) ang samples,” matod ni Mendoza nga ang team natukod sa miaging semana.
Nasayran gikan sa CTO nga dul-an sa usa ka gatos ka resort hotels gikan sa mga dagko o five-star resort sama sa Shangri-la Mactan, ubang inilang hotels ug dive shops.
Si Konsehal Harry Radaza, chairperson sa committee o tourism sa konseho, niingon nga dunay dakong posibilidad mosaka ang mga turista nga moabot sa Lapu-Lapu tungod sa pagsira sa Boracay.
“Kinahanglan nga limpiyo ang kalikupan..,” matod ni Konsehal Radaza.
OSLOB
Business as usual ang habig sa Sumilon Island nga gidumala sa Bluewater Sumilon.
Si Enrico Monsanto, corporate marketing and communications manager sa Bluewater Resorts, niklaro nga dili ang tibuok isla ang maapektuhan sa temporaryo nga pagpasira ni Oslob Mayor Jose Tumulak Jr. sud sa usa ka semana sa sandbar ug snorkeling site aron malimpyohan kay anaa kini sa luyo sa ilang resort.
Matod niya, sila ang usa sa mga ningduso nga mas maayo nga ipa-rehabilitate ang dapit sa sandbar ug snorkeling site kay ilang naobserbahan nga daghang mga turista ang modagsa sa dapit diin ang uban magpasagad og labay sa ilang mga basura ug mopagawas sa hugaw sa ilang lawas kay dili mogamit sa pansayan.
Si Monsanto nisugyot i-regulate sa kagamhanan sa Oslob ang pagpagamit sa sandbar diin daghang mga pump boat ang moanha sa dapit diin moagas ang asete sa dagat.
Alang ni Monsanto dili paigo ang usa ka semana nga clean up drive kay mas maayo ang rehabilitasyon uban sa sustainable tourism program.
“We support Mayor Tumulak, finally. This is a very good move. This is long overdue,” dugang ni Monsanto kinsa mopadala og 15 ka divers ug usa ka marine biologist aron motabang og limpyo dili lang sa mama kondili apil sa ilawom sa dagat diin dunay daghang mga basura.
STA. FE, BANTAYAN
Samtang si Sta. Fe Mayor Jose Esgana mopasiugda og summit karong Mayo diin ipatawag ang tanang tourism stakeholders apil ang mga tag-iya og resorts ug restaurants aron masayod sa ilang responsibilidad nga kinahanglan ang insakto nga paghipos sa basura, sama sa paglain sa malata ug dili malata, ug paghipos sa hugaw sa tawo.
“Kay kining problema sa waste dili man ni ingon nga local government unit lang kay once nga dili na namo ma-control paglimpyo, way lain is to close, so kinsay mawad-an ani, ang tanang stakeholders sa tourism,” dugang ni Esgana.
DENR
Si Department of Environment and Natural Resources (DENR) 7 Regional Executive Director Gilbert Gonzales motahas ni Environmental Management Bureau (EMB) 7 Director William Cuñado nga makigtambayayong kang Tumulak kon unsay matabang sa ilang buhatan.
“I think that’s a good sign na yong LGU is aware para conscious about how to maintain clean and sound environment lalo na sa mga areas na pinupuntahan ng mga turista, that would be good,” dugang ni Gonzales.