PUNTO. Dunay punto si Cebu City Mayor Tomas Osmeña nga ipadayon ang pagtrabaho sa underpass diha sa highway ug eskina F. Llamas st., Mambaling bisan pa sa grabe nga trapiko nga nahiaguman sa mga motorista ug sa mga nagbiyahe ngadto sa south ug padung siyudad.
Kini ang tubag ni Mayor Tomas sa hangyo ni Kon. Joy Pesquera sa mayor nga ihunong ang trabaho sa underpass hangtud nga mapalapdan sa Department of Public Works and Highways (DPWH) ang kilid sa highway.
Ang underpass, matod pa sa taho, duha ra ka dalan kun two way lanes lamang di sama sa underpass luyo sa city hall nga molahus sa SRP nga upat ka lanes kon duha ka dalan matag direksyon. Sa ato pa, mora lang gihapon ni siya sa mga overpass kun “flyover”.
Ang pagbuhat sa underpass, matod pa, mas dako ang budget kay sa “flyover”. Gawas nga mahal ang underpass, mas dugay nga mahuman ug dako na ang kahasul ngadto sa mga motorista ug biyahidor.
Ang pangutana, nganong underpass man ang girekomendar o giaprobahan sa DPWH ug dili ang flyover? Sa pagbuhat sa mga flyover dinhi sa dakbayan dili sama ka grabe ang problema sa trapiko sama karon diha sa Mambaling diin gitrabaho ang underpass. Pagkahibawo sa kadaghanan nga mas dako diay ang pundo alang sa underpass kay sa flyover miisa ang ilang kilay. Unsa kahay ikatubag sa DPWH sa mga pagduda nga tungod kuno sa taliabot nga piliay ang mahal nga underpass ang giaprobahan kay sa flyover.
Sa pagbuhat anang flyover sa Mambaling (highway ug eskina padung sa SM Seaside) wa ko makahinumdum nga ang mga motorista ug biyahidor mireklamo sa trapiko dili sama karon sa pagtrabaho aning underpass nga ang tanan mireklamo lakip na ang mga negosyante, nga nanira sa ilang tindahan tungod kay wa nay customer.
Kining DPWH makahibung og dako tungod kay kining ilang proyekto nga underpass nakahasol imbis nga makaayo Nagtrabaho ba ni sila basi sa lagda sa ilang mandato o naghuwat lang kon unsay itunol nga proyekto gikan sa mga pulitiko?
Tan-awa ra gud. Hapit tanan kilid sa highway dinhi sa Sugbo dunay daghan negosyo sama sa vulcanizing ug uban pa. Apan gipapahawa ba gud ni sa DPWH? Ang akong nahibaw-an, obligasyon sa DPWH ang paglimpyo o hawan sa mga obstruction o naninda sa kilid sa highway.
Di mabasol nga ang Regional Development Council (RDC) mibabag sa pagsugod sa trabaho sa underpass sa UN Avenue, Mandaue city, kon di mapalapdan ang dalan o mabutangan og alternate road sa DPWH ang UN Avenue ug DM Cortes Street tungod sa nasinati sa construction sa underpass diha sa Mambaling.