LAAK, Compostela Valley -- Nagbangutan ang pamilya ug banay sa 12-anyos nga dalagita human naghikog didto sa Purok 6, Barangay Belmonte, alas 7:00 sa buntag, Dominggo.
Ang biktima giila nga mao si alyas Mary, 12, (tinuod nga pangalan gitago) magtutungha, nagpuyo sa Purok 6, Barangay Belmonte, Laak.
Segun sa imbestigasyon sa Laak Municipal Police Station ang biktima gisugo sa iyang magulang nga babaye nga manglaba. Nagyagubgob ang biktima hinungdan nga gisagpa sa iyang igsuon.
Miguwa sa imbestigasyon nga alas 8:40 na sa buntag dihang nabangalan sa iyang inahan ang biktima nga wala nay kinabuhi sulod sa iyang lawak.
Nagpakamatay ang biktima pinaagi sa paghigot og twine sa iyang liog samtang ang laing tumoy sa pisi gigaid sa kisame.
Paspas nga gisapupo ug gidala ang biktima ngadto sa Compostela Valley Provincial Hospital sa Barangay Poblacion, Laak apan gideklarang dead on arrival sa nagtabang nga doktor.
Naglusad na og imbestigasyon ang Laak Municipal Police Station sa maong insidente.