SA KINATIBUK-AN nga Iskolar sa Misamis Oriental moabot ngadto sa 171 ka mga tinun-an ang migradwar sa gikuha nila nga mga kurso sa kolehiyo dinhi sa nagkadaiyang lungsod sa probinsya.
Ang mga lungsod nga adunay graduates gilangkoban sa Manticao, 2; Opol, 8; Jasaan, 18; Lagonglong, 7; Binuangan, 1; Sugbongcogon, 8; Kinoguitan, 8; Talisayan, 22; Gingoog City, 63; MOLT East, 21; MOLT West, 4 ug Villanueva nga adunay 9 ka mga graduates.
Niining gidaghanon tulo ka mga iskolar ang migradwar nga nakaangkon og latin honors nga mao sila si Ma. Geiszelle Casanos, Cum Laude gikan sa Bukidnon State University sa Talisayan sa kurso nga Bachelor of Science in Elementary Education (BEED).
Si Mr. Arthur Reyes gikan sa MOIST sa lungsod sa Lagonglong maoy Cum Laude ug usa ka Leadership Awardee sa kursong Bachelor of Science in Hotel and Restaurant and Management (BBS-HRM).
Samtang cum laude si Mr. Paulo John Aboc gikan sa BSU Sugbongcogon sa kursong BEED.
Gipaabot ni Misamis Oriental Governor Yevgeny Vicente Emano ang iyang dakong pahalipay ug pagdayeg sa mga migradwar nga mga IKNB (Iskolar Ko Ni Bambi) sa probinsya sa Misamis Oriental.
Gipahibalo usab ni Emano nga sa pagradwar sa 171 ka mga iskolar ning tuig moabot sab ngadto sa 171 ang bakanteng slots sa scholarship alang sa school year 2018-2019.
Panawagan niini nga kinsa man ang Misamisnon ug magcollege karong bulan sa Hunyo karon palang daan mobisita na sa buhatan sa IKNB.
Gikalipay ni Emano ang kalamposan sa iyang mga iskolar ug malaumon nga sa ilang pagtapos human niini adunay mga trabaho nga masudlan ug buot niining kuhaon diretso sa trabaho kadtong mga nakaangkon og latin honors.