NAHIMO na nga kabahin sa kasaysayan sa Pilipinas ang Mt. Manunggal sa Barangay Sunog, lungsod sa Balamban, kasadpang Sugbo.
Sa dapit nahagsa ang presidential plane, Mt. Pinatubo, diin namatay si Presidente Ramon Magsaysay ug 24 ka mga kauban niini niadtong Marso 17, 1957.
Matag tuig, handumon ang kamatayon sa anhing presidente pinaagi sa panagtapok sa mga mountain climber nga manungas paingon sa memorial monument ni Magsaysay.
Luyo sa masulob-on nga sugilanon sa Mt. Manunggal, nakadani kini og daghang mga turista labi na kadtong mahilig og trekking ug mountain climbing.
Gawas sa sky biking, horseback riding ug camping, ang Barangay Sunog Eco-Adventure nagtanyag usab og trekking ngadto sa kinatas-an sa bukid o sa Manunggal Peak.
Ang eco-adventure gidumala sa Barangay Unity Key Integrated Development Multipurpose Cooperative (Bukid-MPC) sa pakigtambayayong sa Department of Environment and Natural Resources-Central Cebu Protected Landscape pinaagi sa Protected Area Community-Based Resource Management Agreement.
Memorial Monument
Moabot sa 45 minutos ang trekking paingon sa peak o mag-agad sa inyong paglakaw labi na kon maghunonghunong aron mokuha og mga hulagway sa palibot.
Sa sinungdanan sa baktas, sayon pa kay mosubay sa gatosan ka mga foot path ug kasagbutan samtang ma-enjoy ang bugnaw ug presko nga hangin, ang kahilom sa lasang ug malingaw ang imong mga mata sa mga talan-awon sama sa dagkong mga punoan sa kahoy, mabulokon ug makadani nga mga buwak sa lasang ug mga tanom.
Ang presensiya sa dagkong mga punoan sa kahoy, naghatag og landong sa inyong pagpanglakaw diin madungog usab ang huni sa mga langgam.
Sa trekking, una ninyong malabyan ang Mt. Pinatubo Engine Memorial. Dinhi makita ang makina sa C-47 aircraft o “Gooney Bird” nga gisemento, ang salin sa presidential plane ni Magsaysay.
Duol niini mabasa usab ang marker sa trahedya diin gikulit ang pangan sa mga nangamatay ug ang bugtong nabuhi sa hitabo nga si Nestor Mata, kanhi magsusuwat sa Philippine Herald.
Unahan gamay niini, makita ang memorial monument ni Magsaysay nga gipabarog sa tiles.
Hagit sa trekking
Human sa monumento, magsugod na ang hagit, ang pagtungas paingon sa kinaibabwan.
Dunay bahin sa lasang nga lapukon ang agianan labi na nag-uwan usa ka adlaw sa dihang gisuroy sa Superbalita Cebu ang Manunggal Peak.
Si Armil Largo, usa sa mga guide, niingon nga gibansay sila sa Provincial Disaster Risk Reduction and Management Office (PDRRMO) alang sa insakto nga pag-guide sa mga turista, unsay angay buhaton sa pagtungas ug ang pagtubag og first-aid.
Samtang magkaduol na sa peak, dinhi na ang challenging nga bahin kay hait ug dagkong mga bato na, bakilid ug tungason ang agianan, mas maayo nga manggunit sa mga ugat ug sanga sa mga punoan sa kahoy ug tanom. Moayuda hinuon ang guide nimo.
Sa dayon abot sa kinatumyan sa Manunggal Peak, makita ang nagbuntaog nga dagkong mga bato nga daw sa korona diin makita sa palibot ang silingang mga probinsya sa Bohol ug Negros Oriental ug ang Barangay Tabunan ug pipila ka mga establisemento sa siyudad sa Sugbo.
Tungod sa kataas sa lugar, daw sa makab-ot na nimo ang mga gabon nga naghatag og kalandong sa palibot.
Ang Mt. Manunggal ang labing taas nga bukid sa isla sa Sugbo nga dunay gitas-on nga 1,097 metros (3,599 ka tiil) above sea level.
Naa kini mahimutang sa Central Cebu National Park nga gipanalipdan ubos sa Republic Act 8475 o naila nga Central Cebu Protected Landscape Act diin sakop usab ang Mananga-Kotkot-Lusaran river system.
Angay buhaton
u25cf Magparehistro daan sa barangay outpost diin mobayad og entrance fee ug himuon ang 15 minutos nga briefing
● Di magpasagad og labay sa mga basura
● Mobayad og P80 nga entrance fee sa barangay outpost, P400 sa guide (minimum sa pito ka mga tawo), P300 kon mangaba'g tent