MGA bilanggoan sa siyudad sa Sugbo ug Lapu-Lapu gipaubos sa kinalit nga greyhound operations pinangulohan sa Bureau of Jail Management and Penology (BJMP) inabagan sa Philippine Drug Enforcement Agency 7 ug kapulisan sa syudad sa Sugbo.
Way bisan gamay nga drugas nga nakuha, apan dunay mga cellphone nga iya sa piniriso, hait nga mga butang ug kinaha nga sigarilyo.
Pasado alas 5 kagahapon sa buntag, gisurpresa sa pag inspeksyon sa mga opisyal sa Cebu City Jail ug mga operatiba sa PDEA 7 ug CCPO ang mga binilango nga nabutang sa male dormitory tungod sa nadawat nga report nga padayon ang paghitak sa illegal nga drugas.
Apan nakugang ang mga nag inspeksyon nga wa silay naimbargo nga illegal nga drugas, inay mga gamit sa construction sama sa lansang lakip na sa hait nga mga kutsara.
Gawas niini, nakakuha usab sila og cellular phone ug mga kinaha nga sigarilyo.
Ang modus sa mga piniriso, matod ni Superintendent Renante Rubio, mao ang pagpaagi sa mga sigarilyo sa luyo sa building pinaagi sa pagbingwit sa kontrabando paingon sa sulod sa bilanggoan.
Kaniadto, ilabay ang mga cell phone ug kinaha sa sigarilyo pinaagi sa pagputos niini.
Haskang mahala
Dugang ni Rubio nga tungod sa ilang hugot nga pagbantay sa pagpasulod sa illegal nga drugas, nigara ang sigarilyo.
Matod niya nga mahal ang matag stick sa sigarilyo sa sulod kay nagkantidad og P100-P120 mao nga mohalin og P2,000 ang matag kaha, nga mahal pa sa illegal nga drugas.
“Ang usa nga modus diri sa sulod ang gitawag natog fishing, fishing is that ang kontrabando hiktan nila, tapos birahon sa taas. May kontak sila sa ubos nga nagpaabot, ilang ihigot,” butyag ni Rubio.
Aron di na makasulod ug makalusot ang mga kontrabando, nagbutang na ang kadagkoan sa Cebu City Jail og mga cyclone wire ug mga canopy sa luyong bahin sa bilanggoan.
Lapu-Lapu
Way drugas apan ginagmayng mga sigarilyo ug lighter ang nakuha usab sa BJMP, PDEA ug kapulisan atol sa ilang kalit nga greyhound operation sa Lapu- Lapu City Jail kagahapon sa kadlawon.
Matod ni warden Supt. Julius Arro nga imbestigahon ang mga piniriso nga nakuhaan ang selda og mga kontrabando.
“We are serious with our campaign (against contrabands). Those inmates including their leaders will be subject for questioning to trace where these contrabands came from and how it slipped,” ni Arro sa mga tigbalita. (dugang taho ni JPP)