(Updated)-- BARANGAY konsehal nga nalakip sa listahan ni President Rodrigo Duterte nga nalambigit sa illegal drugs ug gitumbok nga bag man ni Franz Sabalones gipusil patay 1:15 a.m. sa Biyernes, Abril 13.
Naangol ang iyang kauban samtang ang laing sakay nga usa ka babaye wa maunsa.
Ang biktima giila nga si Neil Cañete Abella, 45, konsehal sa Barangay San Isidro, lungsod sa San Fernando, Cebu.
Si Abella nakaangkon og tulo ka mga samad pinusilan sa nawong nga miresulta sa iyang hinanali nga kamatayon.
Kalibre .45 nga pistola ang gigamit sa gunman.
Nasamdan usab ang iyang kauban sa sulod sa sakyanan nga si Enriclint Asdueso Alesna, 41, taga Barangay Poblacion, siyudad sa Carcar.
Si Alesna padayong giatiman sa mga mananambal sa usa ka pribadong tambalanan sa syudad sa Sugbo.
Wa maunsa ang hinigugma ni Alesna nga si Mabel Pedrosa Noel, 43, taga Punta Princesa sa syudad sa Sugbo nga naglingkod sa back seat.
Matod ni Sr. Supt. Joel Doria hepe sa Cebu City Police Office nga gikan sa usa ka kan-anan si Abella kauban sa lain pang mga lalake nga giingong dunay meeting.
Apan sa iyang pagbiya sakay sa iyang kolor yellow nga Honda Fit nga dunay plate number KFG 179, kalit nga gipusil ang sakyanan.
Usa sa ilang gisubay sa pagkakaron ang mga CCTV camera sa dapit aron mailhan kinsa ang bugtong mamumuno sa konsehal.
Dunay daghang mga nakasaksi, apan usa pa lang ang nakuhaan og pamahayag sa kapulisan nga basehan sa ilang pagpadayon sa imbestigasyon.
Motibo
Drugas ang ilang usa sa gitan-aw nga motibo sa pagpamusil tungod kay nalakip sa listahan sa kapulisan ug Philippine Drug Enforcement Agency (PDEA) ang ngan niini.
Siya ang gitumbok nga bagman ni Sabalones nga maoy mohatag sa payola sa mga polic official sa Central Visayas.
“Sa initial investigation natin, ayon sa ating mga investigator, parang lumalabas na drug related itong incident at tiningnan natin yung back ground. Initially nakita natin na kasama siya sa listahan na linabas na bagman at kasama siya sa surrenderee sa San Fernando,” matod ni Doria.
Sa drug matrix nga gipagawas sa Camp Crame, nalakip iyang ngan nga maoy right hand ni Sabalones ug giapil usab iyang ngan nga gitug-an ni Sabalones sa dihang gipatawag sa Camp Crame.
Ni-surrender
Si Senior Inspector Adrian Nalua, hepe sa San Fernando police station, nibutyag sa Superbalita Cebu nga si Abella usa sa ilang gi-monitor nga drug personality sa lungsod sa San Fernando kay usa sa mga surrenderer niadtong Nobiyembre 2016.
Tagsa na lang nila makita ang konsehal sa San Fernando sanglit sa Cebu City na pirme.
Giklaro ni Nalua nga sa nakuha nilang impormasyon si Abella bagman ni Sabalones.
“Mao daw ni siya tigdala sa mga suborno ni Sabalones. Nagmonitor mi ani niya, pero tagsa na lang mopauli sa San Fernando,” dugang ni Nalua.
Niadtong Martes, magtiayon nga kanhi gaway ni Sabalones nasikop sa buy bust operation sa Philippine Drug Enforcement Agency (PDEA) 7.
Ang nasikop mao silang Mesael Palermo, 35, ug iyang asawa nga si Janice, 29, taga Barangay Lagtang, Talisay City.
Nakuha gikan sa ilang posisyon ang 11 ka dagkong pakete sa gituohang shabu nga motimbang og 600 gramos nga gibanabana nga mobalor ang tanan og P3 Million. (AYB, GPL & dugang taho nila ni Nova Leah Carbon, Christine Joyce Secuya, CNU Intern)