USA sa di nako makalimtan nga kasinatian sa nagtungha pa ko sa ika upat nga ang-ang sa Pinamungajan Central School, mao kadtong adlaw nga nanggawas ang tanang tinun-an aron abibahan ang pag-abot sa usa ka Pinamungajanon.
Gipalinya mi daplin sa karsada nga di layo sa nahimutangan sa Santa Monica Parish Church. Gawas namo naglinya sab didto ang bagang duot sa katawhan. Usa kadto ka espesyal nga adlaw alang sa lungsod sa Pinamungajan sanglit usa sa iyang mga anak nilampos pagtuman sa usa ka importanting misyon sa kinabuhi.
Tuod niabot ang among gipaabot nga mao si Rev. Fr. Carlito Pono. Naniyagit ming tanan isip pagtimbaya sa iyang pag-abot. Bag-o lang siya nga gi-ordinahan sa siyudad ug kadtong iyang pagbalik sa lungsod maoy iyang una isip usa ka pari. Human sa mga abiba nisunod ang labing una nga Santos nga Misa nga siya maoy nagsaulog.
Tuig 1975 kadto ug sa paglabay sa katuigan wa nako igkita si Padre Carlito. Hangtod nga nahimo siya nga Kura Paruko sa St. Joseph the Patriarch Parish sa Mabolo, Cebu City gikan niadtong 1991 hangtod 2001.
Usa ka higayon nihapit ko niya didto ug nagpaila nga ang akong Mama taga Pinamungajan ug gipahinumduman sab nako siya niadtong adlaw nga nipauli siya human sa iyang ordinasyon. Nahimuot si Padre Carlito sa akong gi-asoy niya nga kasinatian niadtong 1975.
Ako sab gipaambit niya ang uban nakong kasinatian didto apil na ang binaktasay gikan sa Barangay Punod proper padung sa Hagakhakan dayon lahos na sa lungsod. Akong Mama natawo sa Barangay Punod. Akong lola Manol nagpuyo sa Sitio Dakit sa Barangay Poblacion. Kung way klase tua mi sa Punod nag-atiman sa gamay nga luna nga gitamnan ug mga lagutmon. Unya’g pauli sa lungsod magpas-an ug palwa sa lubi para sugnod.
Isip bag-ong pari si Padre Carlito nag-alagad isip Assistant Parish Priest sa tulo ka parukya nga mao ang San Isidro Parish sa Talamban, Cebu City niadtong 1975-1976. Santo Tomas de Villanueva sa Danao City 1976-1980 ug Santo Rosario Parish, Cebu City 1980-1981.
Gikan sa pagka Assistant nahimo na gyud siya nga Parish Priest sa Santo Tomas de Villanueva Parish sa Matutinao, Badian gikan 1981 hangtod 1991. Pagka 1991 hangtod 2001 nabalhin siya sa St. Joseph the Patriarch Parish sa Mabolo, Cebu City isip Kura Paruko.
Gikan 2001 hangtod 2009 didto na sab siya mag Kura Paruko sa Archdiocesan Shrine of the Our Lady of Guadalupe sa Guasalupe, Cebu City. Pagka 2009 nibalik siya sa San Isidro Parish sa Talamban isip Kura Paruko hangtod 2014. Ug ang katapusan nga parukya gikan 2014 hangtod 2018 mao ang Arhdiocesan Shrine of St. Catherine of Alexandria sa Carcar City. Gawas sa pagka Parish Priest nahimo pa gyud siya nga Chairman sa Archdiocesan Commission on Cultural Heritage.