HUGOT ang gipatuman nga checkpoint sa kapulisan sa tibuok Davao Region sa pagsugod sa pag-file og Certificate of Candidacy (COC) karong adlawa alang sa Sangguniang Kabataan (SK) ug Barangay Elections.
Kini ang gibutyag ni Police Regional Office (PRO) spokesperson Chief Inspector Milgrace Cajes Driz human ilang mas gipahugtan pa ang seguridad sa mga checkpoints sa rehiyon.
"Subay sa atong mandato gikan sa atong regional director nga tanang checkpoints ipailawom sa hugot nga seguridad aron mas malikayan pa nato ang mga election-related violence," sulti ni Driz.
Gibutyag ni Driz nga di hinuon lisod alang sa Davao City sa pagpatuman sa ubang ginadili sa eleksyon gumikan ang pipila niini anaa na sa ordinansa sa siyudad.
Sa hisgutanang magdala-dala og armas, di sab gihapon lisod ang pagpahimangno niini gumikan daan nang nahibalo ang katawhan luyo sa pagpatuman sa Martial Law sa Mindanao.
Alas 12 sa tungang gabii, kaganina nagsugod na ang kapulisan sa pagdugang sa ilang mga personahe sa mga checkpoints aron maseguro nga wala'y makalusot nga mga ilegal nga labot eleksyon.
Ang filing sa COC nagsugod karong adlawa ug molungtad karong Abril 20, 2018, samtang ang campaign period magsugod Mayo 4 hangtud Mayo 12, 2018 diin ang adlaw sa piniliay mahitabo karong Mayo 14, 2018.