NAKASANG-AT na ang uban sa ilang certificate of candidacy. Ang uban nagpaabot pa og tukma nga petsa. Ang uban nag-agad sa petsa kay nagtamod sa gikasabutan sa ilang grupo. Gawas sa petsa ail nga gisabutan ang oras kanus-a mobutho sa buhatan sa Comelec. Ang uban dunay choreography nga gipahaum aron mas alegre tan-awon. Mao ni nakanindot sa eleksiyon sa SK ug Barangay.
KANDIDATO
Sa tinud-anay lang makadaghan nako agniha ug mga politiko nga mokandidato sa bisan unsang position sa barangay. Sama sa uban nakong mga kauban sa media nga nagsugod sa pagpangalagad sa barangay isip pinili nga kapitan ug kagawad, makadani kaayo ang tanyag. Galing lang duna man ta’y tagsa tagsa ka dalan nga gisubay. May dalan nga para sa panerbisyo pinaagi sa eleksiyon. Duna sa’y dalan nga ang panerbisyo diri ra gyud kutob sa media. Mao nga hangtod karon kutob ra ta sa pagpa salamat sa nagdapit sa pagdagan. Ang akong giingon akoy tig-interview sa mga makadaug.
Hinuon, niadtong panahon sa ka batan-on naka sulay naman sab ta ug dagan. Eleksiyon kadto sa Supreme Student Council sa unibersidad nga akpng gieskwelahan. Naghimo ko ug partido nga gitawag ug Kapatid ug nidagan ko sa pagka presidente. Upat mi nga nagtigi sa maong posisyon. Samtang ang akong mga kauban sama ni higalang Nelson Yuvallos maoy akong bise, unya nanagan sab pagka Secretary, Treasurer ug Auditor ang uban. Sa matag department may mga kandidato sab sa pagka sakop sa House of Representatives. 35 ka buok para sa tag lima ka kandidato sa matag department nga naglakip sa Graduate School, College of Law, High School, Commerce, Arts and Sciences, Engineering ug Teachers College. Usa ka semana ang room to room nga kampanya. Sa katapusang adlaw nag-abot ang tanang partido sa quadrangle.
Pagka ugma mao na ang adlaw sa piniliay. Ug ang resulta landslide victory ang among partido. Lusot ming tanan nga gibotaran sa tanang department. Ang House, sa 35 ka kandidato nilusot ang 27 ka kandidato walo ra ang natagak. Kay eleksiyon man sa eskwelahan way hakotay labaw nga way binayranay. Ang sekreto ang kugi sa pagpangampaniya nga nilahos pa ngadto sa mga boarding house.
KUGI
Mao sab ni ang nindot nga ipaambit ilabi na sa mga first timer nga nagbawon ug daghang nindot nga plataporma. Kugi sa pagpangampanya maoy yawe sa kalamposan bahala na ug siging sulti ang uban nga ang eleksiyon padaghanay ug kuwarta. Ug mao sab ni hinungdan nganong nawad-an og gana ang uban sa pagdagan tungod sa isyu sa kuwarta. Suwerte ang mga kandidato giagak ug mga politiko.
SERBISYO
Tungod kay di sayon ang pag-apil sa piniliay, karon pa lang atong saludohan ang mga kandidato. Ilang gipili ang pagserbisyo sa katawhan nga unta mahimo ra man silang magpuyo nga ang ilang pamilya ra’y tutokan. Di sayon ang responsabilidad nga ilang pas-anon taliwala sa daghang hagit sa panahon.
Sa laktod di sayon ang trabaho nga ilang gustong sudlan. Kalambuan sa barangay sa kanunay naa sa ilang hunahuna ug kasing kasing. Panghinaot nga kanuna’yng piskay ang ilang panglawas ug giyihan sa Kahitas-an.