SECTIONS
Thursday , April 26, 2018

Rockets gitugpo ni James Harden

NAGPAKATAP og 44 puntos si James Harden unya iyang gitugpo ang pagsulbong sa opensa sa hosts Houston Rockets sa 4th quarter pai­ngon sa 104-101 nga kadaugan batok sa Minnesota Timberwolves sa pagsugod sa ilang 1st round playoffs series sa National Basketball Association (NBA) kagahapon.

Adunay higayon nga ningbahar ang opensa sa Rockets sa 4th quarter nga maoy hinungdan nga nakalabaw og usa ka puntos ang Timberwolves ug ning higayuna, nagkinahanglan ang No.1 team sa regular season ug usa ka lider nga mopas-an kanila, wala na’y lain kon dili si Harden.

Nimugna si Harden og pito ka mga puntos sa 9-0 run sa Rockets nga naghatag kanila og 94-86 nga labaw sa nahabiling kapin sa upat ka mga minutos.

Ning-rally ang Timberwolves hangtod nga napahak nila ngadto sa tulo na lang ka mga puntos ang labaw sa Rockets pinaagi sa tip-in shot ni Karl Anthony Towns.

Sa return play, nakakuha og kahigayunan ang Timberwolves nga makapugos og over­time dihang nakamugna og turnover ang pambatong pointguard sa Rockets nga si Chris Paul sa himatyong mga segundos.

Tuod man, nakaitsa si Timberwolves guard Jimmy Butler sa three-point area sa nahabiling 1.5 segundos alang unta sa posibleng overtime apan na­sipyat kini.

“Came up short. But I’d shoot it again if I had the opportunity,” matod ni Butler.

Pacers 98, Cavaliers 90

Sa Cleveland, gipakaging sa Indiana Pacers ang hosts Ca­valiers pinaagi sa pagposte og dakong kadaugan sa kaugali­ngon nilang 1st round series.

Kini maoy labing unang higayon sulod sa walo ka mga tuig nga nabunyagan og pilde si LeBron James ug ang Cavaliers sa pagsugod sa playoffs.

Ang Pacers gipangulohan na sab sa ilang All-Star guard nga si Victor Olapido, kinsa nagpakatap og 32 puntos.

Pagsugod pa lang, kontrolado na sa Pacers ang kombati ug nakaposte dayon sila’g 21 puntos nga labaw sa 1st quarter ug wala na sila molingi pagbalik hangtod na sa katapusang gutlo.

Ang Cavaliers gipangulohan ni James pinaagi sa iyang triple-double nga 24 puntos, 12 assists ug 10 rebounds, ika-20 pa lang niya nga nahimo sa iyang kinatibuk-ang career.

Celtics 113, Bucks 107, OT

Sa Boston, nagkinahanglan pa og overtime ang hosts Cel­tics una nila nabuntog ang Milwaukee Bucks sa ilaha sab nga 1st round series.

Gipangulohan ni Al Horford ang Celtics pinaagi sa iyang 24 puntos ug 12 rebounds, nidugang og 23 puntos si Terry Rozier samtang nidugang og 20 puntos si Jaylen Brown.

Ang three-point shot ni Khris Middleton sa Bucks sa nahabiling 0.5 segundo maoy nakapugos og overtime.

Ang Bucks gipangulohan ni Giannis Antetokounmpo pinaagi sa iyang 35 puntos.

Thunder 116, Jazz 108

Sa Okahoma City, nagbangis si Paul George ug nagpauwan kini’g 36 puntos aron agakon ang host Thunder ngadto sa kadaugan batok sa Utah Jazz sa laing 1st round series.

Ang opensa ni George gibuwa­kan og walo ka three-pointers.

Si Russell Westbrook nidugang og 29 puntos alang sa Thunder. (AP, ESL)


VIEW COMMENTS