SECTIONS
Thursday , April 26, 2018

Botante naglisud pag-ila sa kandidato naggamit druga

DAVAO DEL SUR - Giangkon sa mga botante sa probinsiya nga maglisud sila pag-ila sa mga kandidato sa Barangay ug Sangguniang Kabataan (SK) nga nalambigit sa ilegal nga druga.

Miani og reaksiyon gikan sa pipila ka mga molupyo sa probinsiya ang panawagan sa mga awtoridad nga di iboto ang mga kandidatong tiggamit og ilegal nga druga.

Matud ni Annie (apilyedo gitago), 26, molupyo sa Barangay Zone 1 sa dakbayan sa Digos, nga di nila mailhan ang kandidato nga nagagamit og druga hangtud di hinganlan ni Presidente Rodrigo Duterte ang mga opisyal sa barangay nga anaa sa ilang listahan.

Suportado sab ni Glen, 39, ang panawagan sa pipila nga angayang mo-sumite og drug test ang mga kandidato sa piliay aron makita kung limpyo sila sa ilegal nga druga.

Apan sumala ni Abogada Maria Febes Barlaan, provincial election supervisor nga wa naapil sa rekisitos sa Commission on Election (Comelec) ang sertipiko sa drug test.

Hinuon, wa sab nila gidid-an nga mopailawom og drug test ang usa ka kandidato.

Hinuon, gibutyag ni Senior Supt. Samuel Gadingan, police provincial director nga hugot nilang gibantayan nga di makasud ang ilegal nga druga sa probinsiya panahon sa kampanya pinaagi sa random checkpoint ug pagpakusog sa intelligence network. (Orlando B. Dinoy)


VIEW COMMENTS