SECTIONS
Thursday , April 26, 2018

Dugang kahuot sa trapiko gipaabot sa temporaryo nga pagsira sa Mananga bridge 3

MGA motorista nga gikan ug padung sa southern Cebu nga mag-agian sa Cebu South Coastal Road gipahimangnoang ma­kapaabot sa paghuot sa trapiko.

Ang Department of Public Works and Highways temporaryong mosira sa usa sa duha ka mga taytayan sa CSCR sa Talisay alang sa rehabilitasyon ug pag-ayo sa katapusang semana ning buwana.

Si Engr. Leslie Anthony Molina, DPWH 2nd Engineering District head, nipahibawo nga magsugod sila sa trabaho sa usa sa Mananga Bridge 3 sa Barangay Lawaan 2, Talisay City sa tentative nga petsa sa Abril 27.

Apan gusto ni Molina nga konsultahon una ang Talisay City government sa ilang traffic plans sa di pa sila magsugod sa pagpatuman sa proyekto.

Samtang ang rehab project gitinguha nga mahuman sud sa 140 ka adlaw, si Molina niingon nga ilang gi-target nga mahuman kini sa labing dugay 70 ka mga adlaw o sa di pa magsugod ang school year sa Hunyo.

“Paningkamoton gyud namo nga mahuman ta by May. Dili unta nato dugayon kay hapit na baya ang tingklase,” nagkanayon si Molina sa mga reporter kagahapon.

Sa usa ka press conference, si Molina niingon nga magsugod sa rehabilitasyon sa ug pag-ayo sa northbound lane sa Mananga Bridge 3 human nangabot ang ilang tanang mga materyal sayo ning buwana gikan sa South Korea.

Ikaduha na kini nga bahin sa ilang pag-ayo sa Mananga bridge 3. Ang una sayo ning tuiga.

Ilang gitinguha nga sirhan ang tibuok nortbound lane aron pagseguro nga di madisturbo ang ilang trabaho.

Kon kini mahitabo, nakaandam na sila og pamaagi aron pagseguro nga ang trapiko sa CSCR di maapektuhan.

Tipik sa ilang pamaagi mao nga buksan ang southbound lane sa two-way traffic sa alas sa buntag ngadto sa alas 10 sa buntag ug alas 4 sa hapon ngadto sa alas 8 sa gabii.

Usa ka diversion road ang ibutang sa Rabaya street sa Talisay City nga mo-exit sa Tabunok.

Apan giangkon ni Molina nga ila unang konsultahon ang City of Talisay Traffic Operations and Development Authority (CT-TODA) sa di pa ipatuman ang scheme.

Sa iyang bahin, si Cebu Provincial focal person for traffic management Jonathan Tumulak niingon nga andam silang moabag sa DPWH aron pagseguro nga ang trapiko magpabilin hapsay samtang magsugod ang rehabilitasyon ug pag-ayo.

Matod ni Tumulak nga ila usab nga giila ang mga dapit sa Talisay nga magsibing diversion routes.

Si Julieto Flores, presidente sa Cebu Provincial Bus and Minibus Operators Cooperative (CPBMOC), niawhag sa DPWH sa pag-hire og towing firm aron pagkuha sa mga sakyanan nga maaberiya sa CSCR taliwa sa trapiko. (JKV)


VIEW COMMENTS