VIGAN CITY, ILOCOS SUR – Sa labing una nilang panag-uban sa Palarong Pambansa, nakatunol dayon og gold medal alang sa Central Visayas Regional Athletic Association (CVIRAA) ang magsuong sila si Shairah, 12, ug Kathlyn Gabisay, 16, kagahapon.
Ang magsuong Gabisay ningpatigbabaw sa table tennis secondary girls doubles diin ilang gipangpilde ang mga representante sa mga rehiyon Southern Tagalog, CARAGA, ug NCR sa Philippine Science High School sa San Ildefonso, Ilocos Sur.
Sila si Shairah ug Kathlyn parehong mga tinun-an sa Beatriz D. Durano Memorial National High School sa Danao City.
Sa laing bahin bahin, nakakompleto og three-peat nga kalampusan ang Boholano nga si Riza Jane Vallente, 16, sa iyang paghatag og laing gold medal sa CVIRAA.
Si Vallente nipatigbabaw na sab sa 400-meter hurdles event sa athletics nga iyang nahimo gikan pa niadtong 2016.
Ning tuiga, si Vallente mitali og oras nga 1:01.45 aron patigbabawan og balik ang kinaham niyang event.
Si Vallente usa ka tinun-an sa La Union National High School sa La Union, Candijay, Bohol.
Matod niya nga bata pa siya, nahilig na siya ning maong event. Ang iyang inahan, kinsa bronze medalist niadtong 1990 ning maong kompetisyon, maoy nag-impluwensya kaniya.
Laing mihatag og gold sa CVIRAA kagahapon mao si Phoebe Nicole Amistoso, 16, kinsa maoy midaog sa 50M archery secondary girls.
Ikatulo na kining gold medal nga naangkon sa 16 anyos nga taga Sibulan, Negros Oriental.
Si Amistoso maoy naghupot sa rekord sa archery sa secondary girls nga 30M ug 40M events nga iyang narehistro sa miaging tuig.
Ning pagsuwat, ang CVIRAA nakatigom na og siyam ka gold medals, unom ka mga mga silver ug upat ka walo ka mga bronze.