DEAD on arrival sa ospital human gidali og tabang sa Sasa Police Station si Randy Nueva Cadiente, ang amahan nga misunog-patay sa iyang anak nga 3-anyos niadtong Marso 18 sa ilang panimalay sa Purok 26, Malagamot, Barangay Panacan, Davao City.
Sumala ni Police Chief Inspector Emerson Pugong, commander sa Sasa Police Station, nga kagahapon untang adlawa (Abril 18) ibalhin sa Maa City Jail ang suspek apan naghikog kini gamit ang stretchable bandage nga gihigot sa iyang liog sud sa kasilyas sa selda.
"Pangatlong attempt na niya ito, pero ngayon lang natin hindi napigilan kay madaling araw nya ginawa ang ganon, na kung saan tulog ang mga kasamahan niya," ingon ni Pugong, kinsa dugang nagbutyag nga alas kwartro sa kaadlawon kagahapon nagbitay na sud sa kasilyas ang suspek.
Marso 19 nahinabi sa Superbalita ang suspek diin iyang gibutyag nga gusto na sab niyang magpakamatay human iyang nasayran nga namatay na ang iyang anak sa ospital human iyaha kining gidauban.
"Gusto na pod ko mamatay ug mawala sa kalibutan, kay nawad-an gayud kog panimuot sa akong kaugalingon ato labi na kay naglagot ko sa pagbulag namo sa iyang mama," ingon sa suspek sa buhi pa nga nahinabi sa Superbalita.
Nasubo pag-ayo ang suspek human iyang nasayran nga ibalhin na siya sa Maa City Jail ug wa siya'y kaseguradohan sa iyang dangatan didto human diha palang daan sa selda sa Sasa Police Station bun-og siya permi sa giingong pagkulata sa iyang mga kauban gumikan nalagot sa iyang gihimo.
Sa kasamtangan, ang patay nga lawas sa suspek anaa sa morgue sa Southern Philippines Medical Center.