BANTAY, ILOCOS SUR - Ang jumpshot ni Aljay Allosa sa uwahing 10 segundos miagak sa Davao Region Athletic Association (Davraa) Eagles secondary boys basketball team ngadto sa kulbahinam nga 94-93 nga kadaugan kontra Central Luzon (CLRAA) sa Palarong Pambansa 2018 quarterfinals nga gihimo sa San Juan Municipal Gym sa munisipalidad sa San Juan, kagahapon.
Ang CLRAA, suma ni Davraa coach Nestor Sorrosa, napakyas sa ilang paghupot sa bola nga miresulta sa “inbound error” sa nanghinapus nga mga segundos.
"Come-from behind among daug. Biya mi mga 12 ka puntos pero gigukod namo sila sa last quarter den nagtabla-tabla nami," pahayag sa beteranong coach.
Gibana-bana niya ang upat ka ties sa uwahing duha ka minutos.
Ang gisaligan nga sila Vince Petdeo Cuajao sa Holy Child College of Davao (HCCD) ug Lawrence Marione Angeles sa Ateneo de Davao University nagkumboya sa ilang back-to-back three-pointers aron maposte ang 92-93, diin pabiling ga-una ang CLRAA sa nahibiling pinal nga minuto sa bugno.
Ang pagbitbit ni Allosa sa tim ngadto sa kadaugan rason nga miabante sila sa semifinals karong alas 9 a.m., sa wala pa matino nga kaatbang.
Si Cuajao mibubo og 31 puntos aron pangunahan ang tim nga gilangkuban sa mga magduduwa gikan HCCD, Addu, Cor Jesu College of Digos ug St. Mary's College of Tagum.
Futsal
Samtang ang secondary girls futsal, ang Davraa milampurnas og bronse human gipildi ang Cordillera Administrative Region (CAR), 5-2, sa'battle for third' sa Santa Municipal Gym.
Si Joyce Semacio sa Philippine College of Technology nakahimo og upat ka goals samtang ang teammate Diane Cosare midugang og usa.
Ang tim nga gigiyahan ni Alvic Troyo nauna ng napildi, 3-6 kontra Central Visayas (Cviraa).
Ang duha ka tims nag-tie sa first half dayon miabante sa laing deadlocks, 2-2, 3-3, una naangkon sa Cviraa ang kadaugan.
Softball
Samtang sa Cirilo Lao Construction Compound, ang Davraa secondary girls softball team nakasinati sa pakyas nga kapildihan, 5-6 kontra Cviraa.
Si softball coach Willie Bayocboc nagkanayon: "Close fight kaayo kay na-extend mi og duha ka innings. Nauna man mi og two runs."
Samtang ang Davraa elementary ug secondary boys football teams ang na-eliminate lakip na elementary boys ug secondary girls basketball teams.