KARON ang katapusang adlaw pagduso sa certificate of candidacy (COC) sa mga magpapili karong umaabot nga eleksiyon sa Barangay ug Sangguniang Kabataan (SK).
Gihatagan lamang og pito ka mga adlaw pagduso sa ilang COC ang mga buot magpapili sugod niadtong Abril 14 hangtod adlaw’ng Huwebes, Abril 20.
Sa pakighinabi sa SunStar SuperBalita kang Atty. Ramil Acul, City Commission on Elections (Comelec) officer, gibutyag niini nga wala pay lugway ang iskedyul apan nagkadepende usab kini sa kaulohan o sa main office sa Comelec sa Manila.
Gihangyo niini ang mga magduso ilabi na sa katapusang adlaw nga mosabot kung aduna’y mga pagkalangan kay lage posibleng modagsa usab ang mga wala pa naka-file sa ilang kandidatora.
“Atong hangyo sa ilaha pagpasensiyahay gyud ta kung daghan kaayo, magkagubot kay last day na ra ba na wala pa mahibal-an ra nato na kung naa’y extention gikan man na sa Manila, dili man mi kalihok dinhi,” pahayag ni Acul.
Nasayran nga gipangandaman usab sa tinugyanan sa Comelec karong adlawa ang ulahing adlaw sa pag-file sa COC kung ugaling modagsa ang mga buot pa nga moapas sa pagduso sa ilang kandidatora.
Mokabat na sa 2 mil kapin ang nakaduso sa ilang COC niadtong Miyerkules mga alas singko sa hapon sa buhatan sa Comelec sa Burgos street ning dakbayan sa Cagayan de Oro.
Sa gibana-banang mokabat sa 3 mil ang gihulatang moduso sa ilang kandidatora anaa na kini sa 2,063 ang malampusong nakaduso.
Gibutyag ni Acul nga ubay-ubay na ang nakaduso sa ilang mga kandidatora.
“As of 5:00 p.m. yesterday (April 18, 2018) 2,063 sa estimated nato nga 3,000 duol na kaayo,” pahayag ni Acul.