Luzano: Basura manen

Sunday, February 5, 2012

KAANUNTO ngata a maungpot ti kalbaryo iti basura ditoy siyudad ti Baguio? Awan sungbatna kadagitoy a panawen. Kaasi piman dagiti agtawid iti bangsit. Adda met ngamin kano dagiti gannuat ngem adu ti kontrabida. Kasano ngarud masolbar? Siguro, ipantayo met idiay senado bareng sumikattayo pay! Ngek! Apay aniatayo? CORONA wenno LAPIDA?

-o0o-

Have something to report? Tell us in text, photos or videos.

Naggaraw manen dagiti demonyo a driver kano ti taxi! Idi nabiit, nangrape da, pinatayda pay ti biktima. Itay kalabes adda nirape da a pasahero, nagbiag. Ania ngata a klase ti sairo dagitoy a pinarsua? Awan met natiliw. Awan met maitudo? Awan pakatuntunan! Kasanon dagiti biktima ken mabiktima pay? Puros saludsod laengen piman ti adda. Ania't maaramidan dagiti otoridad? No awan, annad laengen ti masapul. Ngipen kano kontra ngipen, kunada. Ngem no bungalka ngay? Dila kano kontra dila! Patay!

-o0o-

Kunada, addu ngaminen dagiti pakasulisugan dagiti demonyo nga utek. Nakiting a kawes. Agsarsaragasag a tapar. Awan kurtinana a barukong. Sumirsirip a let-ang ti ubet. Dagita kano dagiti makagargari a demonyo iti kagimongan ita. Ket ania ngarud ti maaramidantayo ket nakaron ti kina high-tech tayo? No koma ta arraptayo amin, awan ti masulisog.! Ngem simumulagattayo met! Kunada: taotayo laeng. Adda kenkan no kittabem ti sulisog wenno itedmo iti sabali. Ngem kasla nangngegko ti arasaasda: Agtalnakaman dita. Apay saan ka a tao? Wen aya!

-o0o-

Nangrugin ti Panagbenga 2012. Mayat ti busatna. Bassit man kano ti tao iti kalsada, nasedsedda met idiay Athletic Bowl. Napintas a rugi. Sapay koma ta agingga iti ungtona ket kasta ti karagsak ken kapintas dagiti mabuya. Maitangsittayo kadagiti dayo ken turista ti pakabuklan ti Panagbenga. Tinnawen met ketdi a kasta. Sapay koma ta saan a magameran iti kontrobersya. Mabalin tayo nga ipannakkel daytoy iti sangalubongan. Ket kadagiti opisyal ken tattao ken grupo nga adda iti likudan daytoy a parang..... agtamedkami kadakayo apo!

-o0o-

Uniporme dagiti PUV drivers, kontrobersya. Pagaapaanda. Addan dagiti namulta. Ngem ania kadi aya ti umno a kolor ti unipormeda? Red, white, wenno ania? Makariro! Makabusit kunada ta uray ania ti isuotda, matiliwda met. Saan sa kano met nga agtutunos dagiti agpatpatungpal ti paglintegan. Baka kano saan a linteg no di ket LIMTEG! Ala, ayusenyo a tapno mayat. No dipay naplantsa. Awan pay koma ti tiliw! Adda la ngarud sutil ti nagkuna: tapno dika kano matiliw iti color coding, dikan agsuot ti uray ania a tapar. Mabalin ngem sabali ti kasom: OVER EXPOSURE LOKO!!!

-o0o-

EXPOSE: Adu latta kano dagiti colorum a taxi ditoy siyudad. Sige, itudotayo tapno matiliwda. Adu ngamin dagiti report, awan met resultana. Kurang ngata ti report wenno bulag ken tuleng dagit immawat ti report? No pudno ngamin kano adda nagna, awan koman dagita a colorum! Kaasi piman dagiti legal. Ala, no dida kaya... buyaentayo dagita a dungrit. No kabaelanda, ita pay laeng, komendasyon apo! Kunada: adu ngamin kano ti mapurar ti sileng ti pirak isu nga adu dagiti lumsot a palpak! Agbaliwkayon sakbay ti karma! Kuna met dagiti sutil: dida kano mabuteng ta saanda met a ni CJ CORONA! Manen?????

-o0o-

Idi, nasipnget kano ti Burnham Park ken dadduma a parke. Ita, nakaranraniagen a kasla aldaw a kanayon. Mabuhay! Kasta a ti trabaho! Dikay urayen dagiti basnot sakbay nga agkir-inkayo! Ti laeng nasakit ken napait... tunggal adda kali suspetsaenda nga adda kano treasure-hunting!

Pasensyaantayon dagita ta adda kabukbukodanda a mata ken dila nupay di ammo no usto ti utekda... Ngem saludsod dagiti sutil: Apay kano a tunggal asidegen ti eleksyon ket aggigiddan kada agkakawil dagiti patrabaho dagiti nakatugaw? Diak man maawatan. Ngem no ngata NAKAIDDADA? Adda ngata matrabahuanda? Uray nakapugiitda man wenno nakabaluknit basta agtrabtrabahoda, APRUVEN!

-o0o-

No intay buyaen, denggen ken basaen dagiti napaspasamaken idiay Senado panggep iti impeachment trial ken ni CJ Corona, adun dagiti agsisimparat nga isyu, ideas ken dagiti adal ken makapasuron nga eksena. Nalalaingda amin.

Hustisya ti inda sapsapulen tapno adda pagwadan dagiti sumarsaruno pay a kapututan. Ngem aguray kailian. Gimmiddan dagiti reports nga immadu kano dagiti mamirmiraut a Pilipino. Bimbaba kano ti ekonomya. Sus Mariakusina a Napusipos! Silang samet a sintunado ti mapaspasamak? Didan sa met makitkitan dagiti agrigrigat gapu iti kaiimbistigada? Sapay koma ta kammalitayo iti suspetsa. Kas kuna ngarud ni sutil: mangabak man wenno maabak ni CJ Corona, litson ngatan ti sidak a sukat ti bugguong?

-o0o-

Report: Nangato a miyembro ti Gabinete, buking a gimmatang iti pirated a DVD. Nakababain! Agkamkampanya ti gobyerno kontra iti pirata a DVD ken CD... ngem adda met tao wenno nangato a turayen to gobyerno ti saan a nangrespeto iti kampanya. Ti pas-engna, adda dagiti report a nalag-an laeng kano ti dusana. Ngem tay sinuspetsada laeng a nairaman iti kidnapping ken kikil kano... nasibak a sigida. Kastoy kadin ti pagiliantayo? Amangan ta no agsubli ni Gat Bonifacio, adu ti matagbatna! Pangngaasim apo McArthur dikan agsubli, mairamanka laeng it kontrobersya!

-o0o-

Adios apo... yamanek ti anusyo a sumursurot kadakami. No adda kurang... surotentayo iti Tambalanmi keno Tatang Edong 8 to 10 a.m. ti Z radio 98.7FM. Agingga manen ti sumaganad nga isyu!