Luzano: Second floor a kalsada

Sunday, February 12, 2012

ARAMID dagiti adu a drivers ditoy Baguio—singit dita, ditoy ditoy. Kaasi piman dagiti naanus nga agpaspasensia. Dagiti narasok, agkatkatawada ta nalalaingda kano a drivers. Ngen no madisgrasyakayo, isangityo pay ti agpakawan ken agpakumbaba. Naudin ti amin. Agbaliwkan kabsat. Saludsod: Apay a nagadu dagiti matiltiliw gapu iti smoke-belching ken obstruction… apay nga awan ti matiltiliw iti RECKLESS DRIVING? Kuna dagiti sutil: BAKA DIDA AMMO ti kayat a sawen ti RECKLESS DRIVING. Ti ammoda ket SCREW DRIVER A NADAWEL!

@@@@@

Have something to report? Tell us in text, photos or videos.

Ditoy syudad, probinsya ken rehiyontayo…maipatpatungpal ti no-helmet –ticket. No mapanka idiay lowlands, di unay maipatpatungpal. Kudos kadatayo. Ammotayo ti agannurot ti linteg. Ngem aguray ta adda dagiti nakalugan iti motorsiklo a sangapamilya. Nakahelmetda amin. Ngem pordiyos por santo…….nagaduda. Iti maysa a kammali, sangapamilya, dedo, saan aya? Kunada, bawal. Kunak met- MAMATIKA!?!?!?. Agkaraiwarisda dita, dida met matiliw? PATIEM! Pagngipenenyo ti linteg apo! Wenno BUNGIKAYO, este ARRAPKAYO? Ti KARIT- - - - -USAREM ta ngipen mo saan a DILA!

@@@@@

Nagbassit ti syudadtayo. Maymaysa ngarud a distrito. Ngem adu unayen ti lugan ken tao. Ti ammotayo idiay laeng baba ti kaso ti carnapping. Sus ginoo, itay kallabes, kabarbaru a lugan, nagpukaw iti paradaanna. Kadagiti naglabas a panawen, adun a motorsiklo met ti basta kasla asuk a nagpukaw. Ti adal dita— highly-urbanizedtayon, kakailian. Arigtay metten ti NCR. Imbag ketdi ta awan pay report a napukaw a balay! No di ketdi balay a ti ridaw na ket ti bubunganna ta tinakawdan. Saan nga akyat-bahay no di ket akyat-bubungan! Dayta kadi itan ti rupa ti syudadtayo? Rinissuod langaruden ti ginggined, bimmangon. Ngem no ditay agridam, adu pay a delubyo ti sumangbay! Ti adal — dika pakibibiangan ti MUKAT ti sabali… unaem ta AGUY-UY-OY A MUKATMO!!! PWE!

@@@@@

Panagkayakaysa dagiti negosyante iti syudad tapno masaluadan ti City Business District! Musika a nakasamsam-it, kabsat! Gimazen! Pudno dayta. No agsusupaditi utekda, amangata ti kolor ti CBD kasla teknikolor a sementeryo! Ala, kakailianmi a negosyante, adda kadakayo ti pundasyon tapno mapatibkertayo pay ken mapapintas ti lokalidad. Ta ti kinapudnona, iti disso nga awanan iti negosyo a tumartaray, arigna iti musoleo nga awanan agbanbantay. Irupiryo ti ammoyo. Denggentayo met ti kuna ti gobyerno ta saanda met a tuleng. Dida mabalin a patarayen ti sosiedad nga agsolsolo. Agtitinnulongtayo. Tay kunadan: IN UNION may BABY, ESTE, DESTINY!

@@@@@

Itay kallabes a Lunes, napasamak ti nakaam-ames a didigra iti lumaud gapu iti ginggined. Adu dagiti naipatli, nasugatan ken mapukpukaw agpapan ita. Nagpasarantayo met iti kastoy iti napalabas. Ditay mapakadaan ti idudupag ti ginggined no IKUMPARA ITI BAGYO. Ngem no ammo kuma ti gobyerno no sadino ti ayan ti FAULT LINES, adda koma metten dagiti addang nga inaramidda tapno masaluadan ti biag ken sanikua. Kudos apo kadagiti kakailiantayo a timmulong ken tumulong pay. Kuna ngamin dagiti appotayo: No adda kano yugyog, adda didigra; ngem iti high-tech a panirigan—no adda kano YUGYOG, FIRST FLIGHT man wenno SOLO FLIGHT, ADDA GRASYA! BASAG!!!

@@@@@

Nupay adda kunkuna ti PAGASA a pasimudaag dagiti LPA idiay Mindanao itay nabiit, mariknatayo latta ti lammin iti parbangon. Kasla rainy summer ti labas na. Ti nasakit, napudot ti ulo ti tao no oil price hikes ti saritaan. Makapasuron. Ultimo iti agtultuloy a kontrobersya iti impeachment ni CJ Corona, bumegbeggang latta ti panga dagiti nasasaririt nga adda iti prosekusiyon ken depensa. Kuna dagiti sutil: asideg ngaminin ti eleksyon. Ta ania koma ti pakainaigannati LPA, OIL PRICE HIKE ken IMPEACHMENT iti eleksyon? Sus ginoo! Dakkel kabsat ti pagnanaiganda! Kurang la nga mangyasakan iti BADANG ta aghuramintadokan! Problema met amin a sulin ti pagilian. Giddanantayo pay laeng ti BARTEK A KATUGANGAM, apo, MAKABEKKELKAN!

@@@@@

Gapu ti kinatrapik idiay Metro Manila, saan la nga agsisipol nga overpass ken interchange roads ti inaramidda. Adda pay planodan nga ikkanda it 2nd floor to EDSA! Mayat sa dayta a gannuat . Nia ngata no ikkantayo met ti 2nd floor dagiti natrapik a disso ditoy ayantayo kas koma ti La Trinidad road, Magsaysay, Harrison, Bonifacio ken dadduma pay? Masolbar ngata ti traffic congestions? IMPUSIPOS a masolbar! Ti kunam ketdi, addanton dagiti SECOND FLOOR SIDEWALK VENDORS, SNATCHERS, HOLDAPERS, etsetera, etsetera! Baka addanto ketdi maipasngay nga SECOND FLOOR KUTONG GROUP, PATAY!!!

@@@@@

Itay nabiit, nagkasangay ni apo Presidente Noynoy. Arapaap dagiti umili: makaasawamet koman. Ngamin iti tawenna a 52, BAAK pay laeng, este BARO pay laeng. Ket no isu ngarud ti kayatna, dakayomet! Ditay ullayan. Uray sinno ti isaklangnanto iti altar, basta TAO, ayos! Kunamet dagiti sutil: saan ngata a delikado ta uming-ingpisen ti buokna? Amangan ta dinton makasilo iti naganus a papaya? Mamatika! Nagadu dita KALBO ket DESI ti narugmaanda! Depende kano dayta iti BARAKO! Ti laeng nasaem no ti BARAKO ket agbalin a TAKONG! NGAAAAKKKK!!!

@@@@@

Kudos iti OPERATION TAPAL! Nasullatanen dagiti abut-abot a kalsada. Bagmanta nakitada. Urayenda pay ngamin a dumakkel ti abot sakbay nga agtignayda, Ala, yamanentayo ta nariingda. Narigat ngamin a lumawa dagita nga abot ta paglubnakan ti nuang. Masapul a nanamentayo met a ti arudaed ti Road Users Tax a kunkunada. Ket sapay koma ta saan nga agpatingga laeng iti tapal. Makapaapal ngamin dagiti kasesemento, sementuenda manen. Sapay koma ta dinton agsubli dagiti aramid a dagiti laeng kano batog dagiti opisyal ti gobyerno ti nasemento. Saludsod: No mapukaw ti kinagamrud ken porsyento, tumibker ngata dagiti proyektos ti gobyerno? Dikan sumungbat, kabsat. Mabasami ti utekmo. TILMUNEM LAENGEN sakanto IPASNGAW dita UBETMO! Ayos!

@@@@@

Awan espasyon apo… su nga…babayo! Adios mi Amor. No adda kurangna ken nagsobraan toy KARIT KEN KAYETKET, sidadaankami kenni Tatang Edong iti Tambalan Program nga agserbisyo latta kadakayo. Tay kunadan, basta Tambalan, 8 to 10AM Monday to Sunday at 98.7 Z radio FM; Basta KARIT KEN KAYETKET — SUNSTAR - Monday latta kailian. Thanks. MABALOS. Tsuptsuptsup!