Napanen ngem nangibati iti karit!

NAPANEN daydi Mang Gerry... ti ama dagiti taga Print Media ditoy rehiyon. Ngem dakkel a KARIT ti imbatina kadatayo a KAPLUMA wenno MANNURAT. Karit tapno ad-adda a gumayebgeb ken dinto bumaaw ti gartem dagitoy a pluma nga itukit ti masakbayan. Kas tay nayurit: nabirtud ti pluma. Kabaelanna ti mangitukit iti bukel ti masakbayan, ngem kabaelanna met laeng a rippuogen.

Dayta ti birtud ti pluma. Ket iti nainramutan a nagappuanan ni Mang Gerry Evangelista... dinto kalipatan. Saan laeng a kadagiti mannurat wenno padana iti daytoy a paset ti kagimongan no di ketdi amin a nangsursurot iti baddekna, kadagiti natultulonganna, ken kadagiti napatawidanna iti galad a dinto malipatan kaanoman. Adu ti patanormo, Mang Gerry. Maysakami nga agtamed iti gappuanam. Tekkenka a dinto kalipatan. Maysaka a muhon ti kaputotan dagiti mannurat nangisaksakit iti pagimbagan ti sapasap babaen iti rebbengen dagiti adda iti biag-MEDIA. Saem ken liday ti kabingay ti ragsak nga imbatim gapu ta nagtengmon ti ngudo ti bulodmo a biag. Naragsak a biahem nga agturong iti kamang dagiti siuuray a kabaddungalam. Adios! Mabalos! Iti nagan daytoy a benneg ti SUN STAR BAGUIO, ECARTA MEDIA PRODUCTIONS & PROMOTIONS, Tambalan ni tatang Edong ken Lolo Doro ken pakabuklan ti Z-RADIO 98.7 FM... ken pampamilyami... ti INKAM PANNAKAPAGRIKNA! DIOS TI KUMUYOG KABSAT!

-o0o-

Nagsasaruno dagiti rollbacks – LPG ken Petroleum Products. Mayat kunada. Kadakami…medyo makapadanag, apo. Ngamin no intay lagipen ti napalabas, adun dagiti regudon ti rollbacks. Ti imbungana, regudon met laeng dagiti Oil Price Hikes! Adda pay idi eksena nga adayo a dakdakkel nga amang ti oil price hikes ngem iti pannakai-rollbackna. Kasano a dika agdanag? Imbag pay kano tay din agkutkuti ti presyo ta awan segseggaam a danag. Ti ketdi koma kapintasan nga aramidenda ket tay pannakaingato ti sueldo uray awan oil price hikes ken awan komat panagngato iti presyo dagiti amin a gagatangen uray maingato ti sueldo. Iti mamindua a daras wenno rikus kano a maaramid daytoy, mariknatayon ti mas napigpigsa wenno natibtibker a gatad ti tunggal peso a kuartatayo. Daytoy a pormula ti nabayagen a maiyem-emplementar iti Estados Unidos. Saan ngata a mabalin ditoy? Ti ngamin practice ita ket tunggal ngumato ti sueldo dagiti mangmangged, ngumato met ti presyo dagiti gagatangen. Kasla awan met laeng sirbina, saan aya? Saludsod: mapasamak ngata daytoy? Sungbat: MAMATIKAAA! Adda aya met kayatna ti aglugi? IMPUSIPOS NGA IMBALIKTAD SADAKANTO INSALTEK, PERIOD!

-o0o-

Adda dagiti report nga kasla umad-adun sa metten dagiti kaso iti RAPE ditoy Cordillera. Ibaintayo nga aminen nga naladawen. Napasamaken. Sabagay, awan sa ti probinsiya ditoy pagilian nga awan kasoda a rape, wenno panagrames. Kasman la nailasaganen daytoy a pagbasolan iti kagimongan. Idi adda pay laeng death penalty, dida kinabuteng. Adu latta dagiti rapists. Daytoy ngata ket gaput sulisog ni lasag? Kunada ngarud a no ni aglaglagto a lasag kano ti kimmulaidag, abakna kano tay aglaglagto a tukak ken tilapia. Talaga a nailasagen kadagiti tao ti kastoy a kinatao wenno kababalin. Nalakatayo a masulisog nangruna ket adun dagiti pamkuatan tapno makasulisogka. Addaka dita a makaderrep nga aruaten. Makatinnag-pantalon a postura ken makapirsay-underwear a pananggargari. Aminentayo man wenno saan, mas agar-ari ita ditoy lubong dagiti demonyo. Daytoy ti timon dagiti basol. Nga uray nuang, baka, baboy, ken manok ket marames. Inyarasaasda: no maisubli ngata ti DEATH PENALTY, ania ngata ti ratings ti rape cases? Tapikda: uray kano agtutuon dagiti linteg.. gapu iti gartem iti lasag... adu latta dagiti aglabsing. Taotayo laeng kano. Aya?

-o0o-

Itay nabiit, adda pulis a napapatay ket timpaw ti bangkayna. Di ammo ti gapu ti krimen. Simmaruno ti pasamak a pulis met ti arestado gaput panangkidnapna iti maysa a med-rep. Gipit kano. Ket nia koma? Gapu ta gipitka, mangidnapkan? Sus ginoo! Kurang ti disiplina daytoy a pulis. Mangibabain iti nakaikamenganna a grupo. Imbabainna piman ti pakabuklan ti kapulisan a di koma met rumbeng. Sabagay, maysa laeng a kuto daytoy. Naaksiyonanen. Madusan. Nababa pay laeng ti ranggona daytoy a pulis. Arasaasda: kasano ngatan no ngimmato pay ti ranggona, ania ngata ti inaramidna? Makaam-ames a panunoten. Di nakappapati ngem napasamaken. Saan laeng a naminsan wenno namindua nga adda dagiti otoridad a nairaman iti kastoy a klase ti krimen. Ania ngatat kasapulan? Mas nadagdagsen kano a pannusa! Ngata? Daytoy ngata ti gapuna no apay nga adu dagiti di mangrespeto kadagiti unipormado? Daytoy met ngata ti gapuna no apay nga adu dagiti aglabsing iti linteg? Gapu ta pangkis ti implementasyon ti linteg? Sapay koma ta sanguen dagiti maseknan nga ahensiya ti gobyerno daytoy a parikut ti gimong. Ta no saan, yamakmi nga addanto blotter panggep iti KABALYO... NAPILAAN… NAGSIKOG! Rapist – TUMAKAS! Yaaakkkk!

-o0o-

Adayo pay ti Oktubre. Ditanto ngamin a masierto no siasino dagiti kumandidato iti nagduduma a posisyon para iti 2013 election. Ngem adun dagiti agaapa. Dida kayat kano dagiti padada a kapartido. Natural, aglamaten ti panagkaykaysa wenno tepkel ti ayanda a partido. Iti ababa a pannarita, uso manen ti DINNDAELAN WENNO PINNIRDIAN. Uso manen tay panaginkukuna a loyalist ngemn agilako met gayam iti kinatao ken prinsipyona. Uso manen dagitay muldagat a makitada amin nga arudaed ti kalabanda tapno mairugidan ti agdadael ken agpapogi. Kastoy ti kinarugit ti politika ditoy pagilian. Nakababain ngem awatentayo ta isut pudno. Gaput politika, awan kinnabagian. Addanto pay agkabsat ken aggassawa ket agkalabanda iti maymaysa nga akmen nga inda pagtartarayan. Nakakaasi met dagiti tumaray wenno politiko a nasin-aw wenno nadalus ti panggepda nga agsirbi. Manmanon dagiti kastoy. Mas ad-adu kanon dagitay inaramiddan a negosyo ti politika. Sabagay, adda kadatayon a botante no kabigem ti rinuker. Sapay koma ta ditay papurar iti pirak. Kasano no BALITOK? It depends, he he!

-o0o-

Kuna ti Malakanyang kadagiti LGUs... masapul nga iti oras nga alas singko iti agsapa, addan pormal nga anunsiyoda panggep iti suspensiyon ti klase. Saan a tay nainsigudan kano a praktis a sada la agsuspendir no nadaripespesen dagiti ubbing a simrek iti pagadalan. Masapul ngarud a naridamda. Sabag ay, adda met dagiti super-alibtak. Rabii pay laeng, nagsuspendirdan iti klase. Dayta a ti opisyal. Kaawatan ngarud itan a no saan a napintas ti panawen, addan iti rebbengen dagiti lokal nga ahekutibo ti panagsuspendir iti klase. Uray awan kanot storm signal, mabalinda ti agsuspindir no kasapulan. Depende iti situasyon. Ngem no adda storm signals, masurot latta ti reglamento a napasingkedan iti nagbaetan ti Dep-ed ken Pagasa—singal #l – preparatory level; signal #2 –Elementarya ken High School; ken signal #3 – all levels ti awan klasena. Maulit ngarud a masapul nga agridam dagiti LGUs. Di mabalin dagiti tur-og ken kasla pag-ong ti ginadda. So, iti masungad nga eleksiyon, pilientayo dagitay naridam, naalibtak, nasaririt ken pudpudno a public servants. AMEN!

-o0o-

Patrol vessels ti China... addada kano manen idiay Scarborough. Uray idiay Spratleys. Talaga a dida agsardeng, kunada. Mangkarkaritdan sa metten, impir-ak met ti sabali. Masapul met ngarud a mangi-deploytayo met iti salaknib ti pagilian kadagita a disso. Relax lang, kailian. Ta ania ti ipatulodmo sadiay? Bangka a de-sagwan? Wenno maka-tetano a barko? Aganustayo kailian nga aguray iti kaasi manipud kaalyadotayo a nasyon. Impossible met a buyaendatayo lattan a mailupitlupit, saan aya? Kuliglig, mabalin ngata sadiay? Idamagtayo! Ngek! Adios mi amor, chao, mabalos!