Dusngi a dinto kalipatan

DINTO kalipatan ti entero a pagilian ti imbati a lagip daydi Mang Kevin, Mang Dolphy, Mang Porontong. Dinto kalipatan dagiti eksena ti biag nga inna imparang kadagiti nagduduma nga eksena ti pelikula nga inna ginamulo.

Praktikal dagita a benneg ti biag ti gimong no apay nga adut nangipateg kenkuana. Kabibiag ti kaaduan a Pilipino wenno biag ni Juan dela Cruz ti inna imparang kadagiti din mabilang a pelikulana. Isu a naasideg ti rikna ti kaadduan. Malaksid pay kadagiti natultulonganna, nagbalin a masahe ti isem ken estilona tapno maagasan ti sagubanit ti bagi ken utek dagiti simmursurot iti showbiz careerna. Nagbalin ni Pidol a kas rangtay iti baet dagiti pannubok ti biag ken pannakaiparna dagiti naglasatan a didigra ti pagilian iti ima dagiti mannakop. Iti no mano a dekada a nga intay kinuykuyog ni Dolphy iti inna inakem iti biag-artista…adu dagiti adal nga intay tinawid. A ti panagkatawa gayam ket adu ti itdenna iti bagi uray pay adda sagubanitna. Sadino man ti ayanmo itan, Mang Dolphy, sapay koma ta naragsakkan. Adunto pay dagiti tumanor a kas kenka gaput imbatim a pagwadan ken pagtuladan.

-o0o-

Sakbay iti ipupusay daydi Mang Dolphy, nagbalin a kontrobersiya ti kiddaw a mapagbalin koma daytoy kas National Artist. Ngem kasla adun sa dagiti kimmontra. Ngem kalpasan a naibuktaktak a pimmusayen daytoy, kasla immadu dagiti nangayat a mayawat koma metten kenkuana ti nakuna a pammadayaw. Kunada: aniapay la koma ti serserbi ti pammadayaw no ti mapadayawan ket awanen iti daytoy a gimong? Saan aya a naudin ti amin? Saludsod: kastoy kadi ti kabuntog dagiti maseknan nga ahensiya iti panangiyetnagda iti pinal a pangeddengda? Nakakaasi met piman dagiti kuwalipikado nga umawat iti dayta nga award wenno pammadayaw no pimmusayton nga agur-uray. Daytoy ti gapuna no apay nga adda payen kiddaw a rumbeng koman a maisardeng ti pannakaited ti National artist award. Ta kas koma iti kasasaad ni Mang Dolphy…uray pay ngata no iteddan dayta a pammadayaw kenkuana…mananamda pay ngata? Saan ngata a naudin ti amin? Tay kunadan: aanhin mo pa ang damo kung patay ang kabayo? IPAKAIN SA KALABAW!

-o0o-

Makaulawen kunada ti isyu panggep iti no sinno ti rumbeng nga agsuspendir iti klase. Idi damo, Dep-ed ti akin-akem. Simmaruno ti order a dagiti laengen taga-LGU (mayor/governor) ti makaammo, tangay isuda kano ti makaammo iti saaaden dagiti masakupanda tunggal panagbabagyo. Adda manen simmaruno a dagiti laengen barangay kapitan ti agsuspendir. Adun ti maul-ulaw iti kastoy a proseso. Kasanon kadagiti barangay nga awanen ti talek dagiti lumugar iti kapitan gapu ta sadot ken adut bisyona? Mamatida pay ngata? Masapul ngarud nga agridam dagiti maseknan kas pangarigan. Masapul ti nasapa a koordinasyon dagiti taga-LGU ken dagiti pagadalan tapno di kaasi dagiti estudyante. Kas kadagiti kannawidan, sadanto agsuspende iti klase no nabasbasan dagiti simrek nga ubbing. No saan a masuspendir ti klase, agmalmalemda piman nga agkurkuterter iti lammin ta nabasadan a simrek. No agsakit dagitoy, matulongan ngata ida dagiti LGU ken taga-Dep-ed? Masapul ngarud a siertuen dagiti maseknan nga ahensiya no ania ti rumbeng a masurot – Dep-ed, LGU wenno ania? No kayatda, diay la KIMAT KEN GURRUODEN ti agdeklara!
-o0o-

Baro a programa ni Presidente Pinoy – naisina a pagbaludan dagiti matiliw ken mapaneknekan a corrupt officials ti gobyerno. Napintas a gannuat, apo presidente tapno dida mailaok kadagiti dadduma pay a balud. Daytoy ti mensahe ti presidente iti kallabes laeng a 2lst anniversary ti BJMP. Adda dagiti report a dagiti kano pagbaludan dagiti sigud a nangangato a turayen ti gobyerno ket kontudo DVD, LED, TV, Karaoke ken dadduma pay. Adayo iti kasasaad dagiti dadduma a balud nga arig dida makangeg iti musika, makabuya iti telebisyon ken dadduma pay iti uneg ti karsel. Adda 69,735 a pakabuklan dagiti balud iti entero a pagilian iti agdama. Iti dayta a dagup, adu dagiti agnomnomar iti VIP treatment kano gapu ta napigsa ti kapetda. Piman met dagiti awanan kapet. Kudos ti intay ibalangat iti daytoy nainpanawenan a gannuat ni Presidente Aquino tapno mapunasen dagiti suspetsa. Tapik: ania ngata ti maisukat a kas recreation dagiti corrupt officials a mabalud? Adu: dama, pinnuyot ti lastiko, pinnaangat ti lawalawa, tatsing, ken PITIK-BULAG! Aswan ngata ti MAMENTAL KADAKUADA?
-o0o-

Anti-carnapping program ti HPG wenno Highway Patrol Group ditoy rehiyon nga idauluan ni Col. James Macarilay….naingetan. No, apay? Naggapu gayam ni Col. James idiay deppaarnat Mindanao a pakaip-ipanan dagiti makarkarnap a lugan ditoy. Kudos, apo baro nga HPG Direktor. Masapul a dagiti eksperto ti maipuesto ditoy rehiyontayo tapno marippuog dagiti sindikato wenno carnappers. Babaen kenkuana, nagkatlo gayam ti mangbukbukel iti modus dagitoy a carnappers – financier, sales agents, ken carnap group. Innayonna pay a sakbay a gumatang kadagiti second hand a lugan nangnangruna no SUV , Pick-up ken VAN…masapul koma a mapanda pay agkuno iti HPG tapno maammuan no hot car ti mailaklako. Adda pay intapik ni Col. James a no agaramattayo kano iti commemorative plates, ditay koma kalkaluban ti original a plaka ti lugan. Matiliw dagiti aglabsing. Saludsod: ania kadi aya ti paggarteman dagiti addaan lugan nga agaramat kadagitoy a plaka? Tapno awan-sita? Mamatikaaa! No ania ti legal, isu ti suroten. Daplis: No awan agtiliw, kasano ngarud a mapasardeng? AGTILIWKAYO AH! TAY NGAY TILIW-WALANG LAGAY, DI BA?
-o0o-

Adu ti nagpalakpak iti rimmuar ti baro nga anusiyo manipud PMA wenni Phil. Military Academy pangep iti makatao kano a pagarisitan tapno makastrekka. Naibaba ngamin ti height requirement. Sigud ket 5,2” para babbae ken 5,4” para lallaki. Nagbalinen a lima a kadapan, maawaten. Ultimo miyembros iti 3rd sex – bading ken tomboy ket mabalinen. Masapul laeng a makalusotda iti pagarisitan ken di rumbeng nga agkinnikinnida a magna. Ngem adu dagiti natnagan iti kiday. Kunada: Diosko… kasanon no maipasungalngalda iti gubat? Saan ngata a rummuar ti kina-FASIFICA FALAYFAYDA? Di ngata kellaat nga agbalinda a Beke One ken Beke Two no adda makasangoda a GUWAPO NGA ABUSAYAF AGLALO NO BARBON? Kadagiti met tomboy…saan kano unay a parikut kunada ta no addadan kadagiti rigid trainings ti eskuelaan…awanen ti parikut kadakuada ta kasda met laengen lallaki. Ti laeng problema no armendanto dagiti napipintas a babbalasang a kaduada iti kampo. Sabagay, taoda laeng. Addaan puso, rikna ken ..ken…BASTA, BADING MAN WENNO TOMBOY…ADDA DILADA NGA AGSAO!

-o0o-

Pnp-media dual meet…balligi itay nabiit. Kudos kenka apo Pro-Cor Dir. Gen. Benjie Magalong. Daytoy ket tapno mas ad-adda pay ti tinnulong, talek ken serbisyo dagitoy nga ahensiya. Adda ngamin eksena iti sinnakit ti nakem ken dinnadael iti nagbaetanda. Ngem babaen iti manayon a linnangen, pinnatang ken panagsisinnukat iti komento iti tunggal benneg ket mapabileg ti timpuyog dagiti dua a pasken. Kadagiti nagduduma a salip, naipakita dita ti bara ti panagkaykaysa ken panagkikinnaawatan. Sapay koma ta manayon daytoy a gannuat, apo Magalong tapno manayon met ti panagkakayamet ti rikna dagiti taga-media ken kapulisan. Kadagiti partakers, KUDOS!!!! Adios mi amor, chao, mabalos.