Adda biag iti Uong!

PUDNO! Adda biag iti UONG. Adun dagiti findings dagiti Herbal Companies nga adu ti maala a food supplements ken bitamina iti uong. Di laeng ngamin mamati dagiti dadduma. Ket kadagitoy a panawen ti Bagyo ken Kimat kada Gurruod... ita nga kasburan wenno panawen dagiti uong. Kadagiti kapanaran, kabakiran ken kabatuan pay…adu dagiti agtubtubo nga uong. Maysa kadagiti kaimasan a sopas kunada ket uong ti aramatda. Kuna ngarud ti tatangko: idi nagkauna a panawen, UONG ti inda pinagbibiag. Iti met agdama a panawen... kuna ti lolok: UONG ti kasamayan kano a ramen ti panagpaadu ti papolasyon. Haaa? Guray bassit ta kasla immadayon sa ti saritaan. Ah, basta, UONG ADDA BIAG! Saluadam ta UONGMO tapmo di AGBURTONG!

-o0o-

Kalkalpas ti Sona ni President Pinoy. Adu dagiti simmaludo, adu met dagiti nagdusngi iti bangbangir. Ti kayatna a sawen... adda kuntento, adda met saan. Adda nagkuna a mayat ti pannakapalitada dagiti amin a suli ti script tapno didanto babalawen ni Pinoy. Ngem para kadagiti makaawat... adu dagiti kumbensido a kasla pahapyaw laeng daytoy iti pudpudno a mapaspasamak kas koma iti peace and order, panagadu dagiti agrigrigat a Pilipino ken dadduma pay a parikut ti pagilian iti agdama. Kunada: adu ngamin dagiti pilosopo. Adda dagiti di mamati, adu met dagiti agsaludo. Adda nagkuna a saan sa a nasayaat ti pannaka-scriptna. Kuna met dagiti maka-Noynoy: husto laeng ti linaon ti SONA. Nupay dipay naaramid, masapultayo ti projections wenno puntirya ti masakbayan. Urayentayo laengen no ania ti mapasamak kadagiti PUNTIRYANA. No sumablay, ditatayo nga agkutak. Kas kunada: narigat ti manghusga no manot mapissaan kadagiti itlog no dipay met nagitlog ti manok!

-o0o-

Adu a taga Cordillera ti agur-uray a tapiken koma ni Apo Presidente ti isyu panggep iti otonomya ti Cordillera. Ngem nadismayada laeng. Baka met nalipatanna, kunada. Mabalin met a dina pay ammo ti naguneg ti nakuna a panggep nga otonomya. Ultimonto pay isyu dagiti OFWs a kas pagaammotayon a bannuar ti pagilian para iti dollar reserves-tayo... ket saan a natalantan wenno nadaplisan iti SONA ni Pinoy. Mabalin a nakabawan kano ti nagaramid iti script ti president wenno dina ammo dagitoy nga isyu. Ala ket aguraytayo manen iti sumaganad a SONA.. ta adu pay. Agobserbartayo ketdi ken tumulong iti gobyerno kadagiti proyektosna para kadatay amin. Arasaasda: baka met para iti personal nga ambisyon ti panggep daytoy nga otonomya. Amangan ta pagkuartaanda laeng? Ngem ti makitami... nadalus ti panggepda para iti Autonomous Region of Cordillera. Masapul laeng ngamin a maipaawat. So? Ipaawatyo a naimbag tapno didakayto batuen iti chicken dung!

-o0o-

Nasibak kanon ti pulis a himmarang iti convoy ni Pres. Noynoy Aquino itay kallabes. Nasibak iti puestona iti Quezon City Police Force wenno ania? No maikkat iti akmenna, natural a mabalin a mayakar met laeng daytoy iti sabali a puesto. Adu a pulis-Baguio ken Cordillera ti nagkomento iti daytoy. Mangibabain kano dayta a pulis. Kuna met ti dadduma... amangan ta pudno dagiti report a namin-ano gayamen a nakasuan daytoy. Kayatna a sawen – natangkenen ti ulona. Ti adal ditoy: No makitam ti sweeper wenno mangidadaulo iti convoy ket palpalissiennaka, ay ket aglisika. Saan laeng a convoy dagiti VIPs no di ketdi kasta met no adda agdadaras nga ambulansiya ken bombero. Dika ipannakkel a puliska. To Protect and to Serve ti akmenda, saan ketdi nga agabuso gapu ta armadon ken addaanen iti silbato kuntudo unipormi. Disiplina kakabsat. Adda bimmugtak: MAMATIKAAA! Witwiw!

-o0o-

Itay laeng nabiit, adda dagiti menor de edad ti natimbog dagiti orotidad iti akto nga agsussusop iti Marijuana. Nakabaluden ti kaduada a natawenan idinto ta naipan iti DSWD for councelling ti tallo. Kastoy kadi itan ti kagimongan? Ti nakas-ang…adun dagiti menor de edad ti matimtimbog gapu iti illegal a droga. Kayatna kadi a sawen nga isuda itan ti puntirya dagiti sindikato gapu ta dida pay laeng agbalud gapu iti linteg? Ay ket masapul ngarud nga agmata ken agsiip ti gobyerno. No kasapulan nga imyendaanda ti linteg wenno ania?

-o0o-

Bimtak a kasla gurruod ti iruruar ni sigud a Presidente Gloria Macapagal Aroyo manipud VMMC. Nakapag-piansiya ngamin iti maysa a milyon a pesos. Ngem dina kayat a sawen nga awanen ti sanguenna a kaso. Iti electoral sabotage, ag-hearingda pay laeng. No panggep met iti PLUNDER…agur-urayda pay laeng iti sumaganad nga addang. No adda mairuar a warrant of arrest... maaresto manen. Ti adal dita: Saan a bulag ti linteg wenno hustisya. Daplisda: no dadduma ket arrap ken duling! Aniaaa?

-o0o-

No sinno ti sumukat a kas Sumpreme Court Justice..kalpasan a nababtuog ni SC Chief Justice Corona... manarimaanen ti pannakasukimat kadagiti nominante. Iti 22 a dagupda, addan dua a disqualified. Adda nakadidillaw kunada: apay kano a nagngayangay pay laeng ni DOJ sec. De Lima idinto ta ammo ti amin a nadekket daytoy kenni Pinoy ken maysa kadagiti nangigisa idi ken ni Corona iti impeachment trial iti senado? Saan ngata a nakadidillaw nga adda PALAKASAN kas pangarigan no isu ti agtugaw kas chief justice? Ala, dakayon ti agbaen, este, sumungbat, apo!

-o0o-

Kanayonen ti patrulya dagiti kapulisan aglalo iti rabii. Kadagiti parke, nasisipnget a disso, umok dagiti holdapers, agraman umok dagiti agdi-date. Adda ngamin dagiti report nga ultimo dagiti agdi-date kadagiti parke ket maholholdap. Mabainda laeng isu a didan agrepreport iti pulisya. Kudos apo iti BCPO ken PRO-COR. Adda pay napasamak itay nabiit a naholdap a balasitang idi manarimaan a makipilpila iti terminal ti PUJ iti CBD. Tapik met ti kapulisan: kadagiti addaan napipintas ken nangingina a celfones, ipods ken dadduma pay nga aruaten... dikay koma ipasindayag wenno aramaten dagitoy kadagiti alanganen a disso. Awan dumana daytoy kadagiti DANDANIN TUMPUAK A BARUKONG a kasla umay-ayab kadagiti KUMAKAMMET KADA UMAAPPOT. Ingat lang!

-o0o-

Nairugin a matrabaho ti kasukat dagiti talipapa iti block 4 iti Hilltop. Mayat! Immunan ti block 3. Maar-aramaten. Natural, idi nalukaisan, awanen dita dagiti mannipdot. Manmanon dagiti masipdotan iti celfon. Napananda ngata, kunada? Natural immkarda laeng. Addada pay laeng dita public market. Annad laeng ti masapul. No adda dimmungpar wenno simmallabay kadakayo a diyo met am-ammo, agarikapkan kadagiti ramitmo. No ada mapukpukaw, agriawkan! Adda latta tumulong kenka uray awan pay laeng dagiti pulis. Ngem adda immarasaas: aduda dita, ngem apay a dida tiliwen sakbay a makabiktimada? Maikaniwas iti linteg daytoy. Masapul nga adda ag-complain wenno agreport a mangitudo no siasino dagiti suspects. Kasuam ida. Ngem no saanka nga intresado, natural, umaduda. Kuna ti maysa a sutil: mabalin ngata ti agrequest iti klase ti celfon a sipdutenda ta gatangenmi iti barat a presyo? Mabalin no laketdi ta aggiddankayo a maturog iti uneg ti selda! O, ha? Wala ng espasyo... adios mi amor... ciao mabalos!