Mammanday-linteg… agsusubangdan! | SunStar

Mammanday-linteg… agsusubangdan!

Time to read
3 minutes
Read so far

Mammanday-linteg… agsusubangdan!

Monday, October 02, 2017

ARASAAS: North Korea ken Amerika...agpinpinnudotdan. Gapu laeng kadi kadagiti partuatda nga armas-panggubat? Wenno iti estilo a pinnasikatan? Tsk tsk...sapay koma apo mayadayokami iti delubyo.

Arig dipay nakabangon ti lubong kalpasan ti maikadua a gubat-sangalubongan.

Kasla adda manen bumegbeggang a senyales iti nadara a rinnisiris iti masakbayan gapu laeng iti panagpartuat iti armas ken pannakasubok dagitoy. Sapay koma ta di mapasamak ti pagam-amkan ti kaadduan.

Daytoy ket nainlubongan a tensiyon iti agdama a masapul koma a masebseban.
Tensiyon-pang-internasyonal daytoy, pards...ngem ammoyo kadi nga adda met mapaspasamak ita a tensiyon pang-nasyonal? Sadino? Gubat sadiay Marawi? Saan laeng a dita, kabsat...uray idiay pagpandayan ti linteg, aggugubatdan. Aniaa?

-o0o-

Adun ti maum-uma ken mapukpukawanen iti respeto gapu kadagiti mapaspasamak dita pagpandayan ti linteg wenno pakabuklan ti kongreso. Ta apay koma? Maryunes... no sumursurotkayo appomi kadagiti makapalusdoy nga imbestigasyon nga ar-aramidenda (Lower House ken Senado) siyento porsiyento nga adda danagmo, kabsat.

Umuna, ti gasgastuenda kadagita agrurutong nga imbestigasyon ket kuwarta dagiti umili. Maikadua, dida met agkaykaysa iti panagimbestiga. Adda pay salawasaw a salawasaw a di na met ammo ti sasawenna. Adda met dagiti agpakalaing a kasla isudan ti kalaingan iti rabaw ti daga ngem ubbaw met dagiti lablabidenna. Addaka dita a porma a porma tapno makita laeng ti sibubukel a pagilian ti rupana ngem awan met bagas ti ibukbukana. Nupay saan met ketdi nga amin. Adda met dagiti mammanday-linteg a saan a porma no di ketdi nabagas ti tunggal ibbatanna a banag. Ngem kuna ti kaadduan nga agob-obserba... adu nga oras ti masaysayang dita. Kasano kano a masayang? Saggaysaentayo nga ibuksilan:

-o0o-

Iti laengen pannakaiparang dagiti inimbitaranda a tattao , maim-imbestigaran man wenno witness...adun dagiti agsisimparat a di pagkikinnaawatan.

Abutenna iti no mano nga oras ti pannakaipangeg ti tunggal benneg dagiti mammaday-linteg, kontra man wenno saan.

Dagiti metten agkalalaing a mammanday-linteg ti agririnupak iti kapanunotan. Nakatumeeng piman dagiti naimbitaran a testigo. Imbes koma a liklikanda ti adu a teknikalidad... saan met ta kasla tren ti LRT a tumaray santo agpugak. Haayna biag.

No ababa laeng ti sentronmo nangruna no addaka a siimatang sadiay... amangan ta makaisawangka iti saan a malamot ti takong. Ti nasakit...aggigiddan dagiti im-imbestigaranda a kaskaso.

Adda met korkortetayo ditoy pagilian...apay kano ngamin nga isuda ti agim-imbestigar? Kuna met dagiti legalista.. in aid of legislation kano dagita nga ar-aramidenda. Ngem kasta a kabayag? Saanda met akorte, kuna met dagiti dadduma... dida met makayetnag iti dusa kadagiti maduptalanda a nagbasol. Agirekomendardanto laeng kadagiti maseknan a korte no ania ti rumbeng.

Ngem kadagiti nalpasdan nga inimbestigaran...mano ditan ngata ti nalpas ken nayetnagan iti pannusa? Adda kadin nakombiktar? Mano a porsiyento ti nakumbiktar iti kinaadun dagiti linudonludonda nga inlupeklupek kadagiti nga imbestigasyon? Adun dagiti naibabain iti entero a pagilian gapu kadagita nga imbestigasyon.

Ngamin, iti pannagna ti letigasyonda, kunada...kasla kumbiktadon ti suspetsa. On air kadagiti teleibisyon ken radio dagita a letigasyon. Piman met dagiti saan a makasao a mangikalintegan iti bennegna. Piman a matabtabbaawan a kasla piyek a pinanawan ni nanangna. Saan kadi a panagsayang laeng iti oras dagita?

-o0o-

Itay nabiit...adda maysa a kongresista ti nangisingasing a rumbeng koma kano a saan a maaresto wenno makassuan ti maysa a mammaday-linteg iti isyu ti panaglabsing iti linteg-trapiko no manarimaan ti sesyon.

Adu ti nagkotak. Agbibinnakal manen ti laing dagiti nauutek a representante. Ngem iti ungtona, inlawlawag ti nasao a kongresista nga inadawna ti singasingna iti seksiyon 11 ti artikulo 6 ti Konstitusyon a ti kunana: “Ang isang senador o kagawad ng Kapulungan ng mga kinatawan sa lahat ng mga paglabag na may parusang pagkakabilanggong hindi hihigit sa anim na taon, ay dapat na may prebilehiyo laban sa pagkaaresto habang may sesyon ang kongreso.” Iti mas praktikal a pannakailawlawagna.... di rumbeng kano a maaresto ti maysa a mammanday linteg a naglabsing iti trapiko no di ketdi mapalubosan nga umatindar pay iti sesyon sakbay a maisuko.

Kuna met dagiti sutil... addan aya nadamagtayo a nakassuan wenno natikitan a pulitiko (taga-kongreso) no traffic violations ti saritaan? Kasanom a sitaen, kunada...ket nagadu ti escortna wenno bodyguardna? Uray awanen ti wangwang...agkakanagpiit met dita ti ngiawda tunggal agbanesbes ti lugluganda. Sabagay, saan nga iti amin. Ultimunto pay ni Prtes. Duterte ket agtulnog iti linteg-trapiko, dagitinto ket ngatan mas nababbaba ngem isu ti agsukir?

-o0o-

Itay laeng nabiit, nagkikinnugsil manen dagiti senador a taga mayorya ken minorya gapu iti di pagkikinnaawatan iti im-imbestigaranda a kaso idiay Senado. Pudno a nagpipinnudotdan ta napasardeng ti hearing gapu kadakuada. Sinno met ti saan a mairita ti kasta nga eksena?

Saan aya a naawagan iti “Mataas na Kapulungan” wenno “Nangato a Paggimongan” ti pagilian ti Senado? Ngem iti panangtimbang dagiti makasaksaksi kadagita a regudon ti sinnubang ken rinnupakda ket kasla agbalbalinen nga inutil ti institusyon.

Obserbaranyo, pards...kaadduan a hearingda ket magameran iti pinnudot, binnarsakan iti pitak, agtitinnudo... iti ababa a pannao, kasla mabasbastosen ti institusyon, saan aya? Pinnalaingan iti expose uray kurang met iti basehan no di ketdi puros suspetsa pay laeng. Adda met dagiti testigo a kasla agpapaaramat laeng tapno mapasingkedan ti akusasyon wenno insipsipda a kaso.

In short... makauman, kunada, ti makitkita dita a kultura ti puros porma-porma, pang-inarte, pang-eepal, pag-angkas, pagsakay ken pagsawsaw tapno makaala laeng iti atensiyon ti kumunidad. Siguro no sibibiag pay daydi lolok, iyasaanakayo iti ragadi. Oras ken pirak ti umili ti masaysayang kadagiti nga eksena. Ti angpepna... awanto met laeng ti tinnag dagiti inimbestigaranda.

-o0o-

Itay nabiit, maysa manen a singasing dita Kamara ti nagbibinnarsakanda iti abilidad. Dayta ti singasing a Philippine Legislative Police wenno kabukbukodan a security group para laeng kadagditi mammaday-linteg. Adu ti natnag ti kidayna. Saan kanon a kasapulan. Amangan ta agsubli manen dagiti kunkunada idi a political goons.

Mangted laeng daytoy iti “wrong signal” kadagiti umili nangruna kadagitoy a panawen nga adu dagiti kameng ti PNP ti mairamraman kadagiti krimen. Kunada, nayon a paggastuan manen dayta ti gobyerno ken maysa a duplikasyon laeng iti trabaho ti pulisya ti pagilian.

Nakasaangen iti Kamara ti nakuna a bill. Pugtuanyo no sinno ti akin-singasing? Ni Cong. Rodolfo Farinas, House Majority Leader. Isu met laeng ti nangisingasing iti immunity dagiti mammaday-linteg iti traffic violations. Imparangmi laeng dagiti eksena dita pagpandayan ti linteg maibase iti rupana iti agdama a panawen. Adu dagiti rumbeng a trabahuenda iti mas nabagbagas koma a pamkuatan a saan ketdi a panagsaysayang laeng iti oras ken pirak dagiti taxpayers.

Awan kabkabigenmi iti daytoy a gundaway no di ketdi public interest and public trust. Batobato sa langit.

***

Please share your experience with LOLO DORO “JIMMY LUZANO” AKA. MR. CARIñOSO as we celebrate 50 years in the industry. Send to 0928-506-5269. Thank you,Adios mi amor... ciao, mabalos!

Published in the SunStar Baguio newspaper on October 02, 2017.

Latest issues of SunStar Baguio also available on your mobile phones, laptops, and tablets. Subscribe to our digital editions at epaper.sunstar.com.ph and get a free seven-day trial.


View Comments