Gensan: Nagkuha’g court clearance sikop (4:35 p.m.)
GENERAL SANTOS — Gisikop sa mga awtoridad sa Lagao Police Station ang usa ka lalaki nga mokuha unta og court clearance sa Hall of Justice tungod kay nasuta nga dugay na diay kining gipangita sa balaod.
Matud pa ni Police Officer 1 Alberto Alberto, imbestigador sa kapulisan sa Lagao, nga nangayo og tabang ang personahe nga nadestino sa Hall of Justice aron tabangan siyang sikopon ang suspek samtang anaa pa kini sa sulod.
Hinungdan nga subay sa warrant of arrest ubos sa paglapas sa Presidential Decree 533 nailhang anti-cattle rustling law of 1974 gisikop ang suspek nga si Mario Zamora, hamtong ang panuigon molupyo sa Purok Quilantang, Barangay Tambler ning dakbayan sa General Santos.
Imbis nga makuha sa suspek ang clearance, bilanggoan na hinuon ang iyang nasudlan. Samtang gipangita pa ang laing 4 ka mga kauban nga nalakip sa warrant of arrest nga gipagawas batok sa suspek nga unang napasaka ang kaso sa Tambler Police Station.
Temporaryong makagawas sa iyang selda ang suspek sa higayon nga siya makapiyansa og P36 mil sa kasong iyang giatubang. (SuperBalita General Santos)
Leave a Reply