General Santos: Drayber nga batan-on gibugha (3:49 p.m.)
GENERAL SANTOS CITY — Kritikal ang kahimtang sa 16-anyos nga traysikel drayber human gipusil sa iyang pasahero Martes sa gabii sa lungsod sa Polomolok.
Si Police Inspector Ramil Villagracia, OIC sa Polomolok Police Station nag-ila sa biktima nga si Angelo Malong, molupyo sa Azucena street, barangay Poblacion nga naigo sa sa iyang likod ug ang bala milapos sa iyang dughan.
Matud ni Villagracia nga alas 11 sa gabii misakay ang suspek sa traysikel nga gimanehoan sa biktima nga nagbaton sa plakang MY 9092 ug nagpahatud sa Dulay Subdivision.
Apan pag-abot sa maong lugar buot pang pasudlon sa suspek ang sakyanan sa suok nga dapit apan wa na misugot ang batan-ong drayber mao nga nahitabo ang lalis.
Human sa insidenti misibat ang suspek padulong sa Waling-Waling street samtang ang biktima gisapupo sa mga nakaagi sa lugar ug daling gidala sa Buntoyan clinic apan gibalhin sa South Cotabato Provincial Hospital. (SuperBalita General Santos/Mel Coronel)
Leave a Reply