Davao: Milapa sa asawa nasikop (2 p.m.)
BALHOG na sa selda sa kapulisan ang 37 anyos nga electrician nga maoy suspek sa pagtigbas-patay sa 20 anyos niyang live-in partner sa Dalisay, Agdao, dakbayan sa Davao.
Gi-pick-up sa mga sakop sa Sta. Ana police station, sa pagpanguna nila ni Police Senior Inspector Ranulfo Cabañog ug Police Inspector Reynaldo Capute mga alas 6:00 sa gabii sa may kanto Lapu-Lapu ug Torres street si Joel Erosido Pandac.
Si Pandac mao ang gitudlong milapa sa iyang kapuyo nga si Gina Anton Handumon, helper sa usa ka kan-anan.
Si PO2 Richard Dionisio, imbestigador sa kaso, nagkanayon nga human gyud sa insidente niadtong Huwebes sa gabii daling misibat si Pandac.
Apan sa ilang gihimong pakignegosasyon, mitahan sa iyang kaugalingon ang suspek.
Matud ni Dionisio, “lovers’ quarrel” ang hinungdan sa krimen sanglit nahitabo una ang ilang grabeng panaglalis sa wala pa nahitabo ang ngilngig nga insidente. (RCO)
Leave a Reply