Davao: Rambol sa batan-on, usa patay (12:22 p.m.)
DAVAO CITY — Usa ang patay samtang kritikal ang kahimtang sa iyang higala human sila gipamusil atol sa nahitabong binaslanay batok sa ilang kaaway sa Barpa, Agdao, dakbayan sa Davao niadtong Sabado sa gabii.
Hingkabsan sa iyang kinabuhi mao si Rey Laput Gavino, 19, samtang padayon pang gitabang sa bay tambalanan si Rogie Segovia Pitaliar, 20, pulos molupyo sa Barpa.
Sa gihimong imbestigasyon ni PO3 Jeremias Cunanan sa Sta. Ana police station natumbok ang suspetsado nga usa ka alyas Atit Esnardo, 23, molupyo gihapon sa nasangpit nga dapit.
Matud ni Cunanan nga sa wala pa ang pagpamusil, naglakaw si Esnardo sa dalan pauli sa ilang bay.
Apan giatngan siya nila ni Gavino ug Pitaliar kuyog ang mga higala ug gitabangan sa pagkulata tungod sa giingong daang atraso.
Nagtinguha nga mobalos, mibalik gyud si Esnardo nga nagdala og kahoy kuyog ang iyang igsuon nga si Jay-ar.
Nakakita og higayon, gipusposan ni Esnardo sa iyang dala nga kahoy si Pitaliar tumong sa ulo dayon nanagan usab sila pauli sa ilang bay.
Tungod niini, gitapok ni Pitaliar ug Gavino ang ilang mga kaubanan ug gisulong nila ang managsuong Esnardo sa ilang pinuy-anan.
Wa nila damha nga nagbaton diay og wa matinong kalibre sa armas si Esnardo ug didto sila gibanatan sa pagpusil sa makadaghang higayon.
Way suwerte sila Gavino ug Pitaliar kay maoy napurohan sa mga bala samtang nanagan ang ilang mga kaubanan.
Leave a Reply