Davao: Nipalit og bugas, gipusil (1:30 p.m.)
LALAKI samtang naglinya aron makapalit og barato nga NFA rice gipusil patay didto sa Upper Malagamot, Panacan, dakbayan sa Davao kagahapon sa kaadlawon.
Gituuhan nga mga gikatahapang mga vigilantes ang mipusil.
Si PO2 Estrello Ramiso, imbestigador sa Sasa police station, miila sa gipatay nga mao si Felipe Rebucas, 30, laborer, molupyo sa purok 15, Indangan, Buhangin, ning siyudad.
Nahitabo ang insidente alas 4:00 sayo sa kaadlawon sa may NFA retailer outlet sa purok 26 sa Malagamot, duol sa boundary sa Indangan.
Ang biktima, kuyog ang iyang mga ginikanan ug igsuon ug ubang sakop sa pamilya, sayo nga minglinya aron maoy makauna pagpalit sa tag usa ka kilong NFA rice sa pag-abre sa outlet alas 6:00 sa buntag.
Apan usa ka wa mailhing armado mitapad kang Rebucas ug diretsong mipusil kaniya sa dul-it nga distansya sa makadaghang higayon tumong sa ulo.
Dead on the spot si Rebucas. (RCO/Sun.Star SuperBalita Davao)
Leave a Reply