General Santos: 7 anyos naligsan, napisat (2:27 p.m.)
USA ka 7 anyos nga batang lalaki ang nabugtoan sa iyang gininhawa human gidaro ug nalatayan sa ligid sa usa ka sakyanan alas 8:50 sa Sabado sa buntag sa Mabuhay road dakbayan sa General Santos.
Ang Traffic Control Division (TCD) ubos sa General Santos City Police Office (GSCPO) miila sa menor nga si Cresen Villarmenti Jr., molupyo sa Mabuhay road, barangay San Isidro ning siyudad.
Si SPO1 Adolfo Eucampo, imbestigador sa kaso, nagsulti nga nitabok ang biktima sa dalan dihang gidaro sa forward truck nga gimaneho ni Joseph Domingo, 48, minyo, molupyo sa Guijo street, barangay Lagao.
Wala matud pa mabawi sa drayber ang manobila sa iyang sakyanan dihang ni-overtake sa laing sakyanan hinungdan nga didto midiretso sa gitabukan sa 7 anyos.
Nalatayan ang iyang ulo apil na ang lawas sa biktima.
Si Cresen Sr, amahan sa bata, miingon nga iya gyud nga nakit-an kung unsa ang gidangatan sa iyang anak sa dihang nalatayan sa ligid sa sakyanan.
“Ako gyud nga nakit-an kung unsa ang pag-antos sa akong anak, perting luoya,” matud sa amahan.
Bolontaryong mitahan sa kapulisan ang drayber. (Mel Coronel/Sun.Star SuperBalita General Santos)
Leave a Reply