Davao: Pulis gitulis, gipusil (12:36 p.m.)
DAVAO CITY — Dili pa kaayo tantong malas ang usa ka pulis kay wa siya maintimano dihang gipusil sa usa sa lima ka mga suspetsado nga miholdap ug miilog sa iyang armas sa NHA Buhangin, dakbayan sa Davao kagahapon sa buntag.
Luwas na hinuon sa delikadong kahimtang apan padayon pang gitambalan sa ospital ang biktima nga si Police Officer 3 Marlon R. Carreon, 35, nadestino sa Malita Municipal Police Office sa Malita, Davao del Sur.
Nasayran nga si Carreon ania sa dakbayan sa Davao kay mipailawom sa training ug kasamtangan siyang nag-”schooling” sa Regional Training School nga nahimutang sa Mintal, Tugbok district.
Samtang nag-atang og sakyanan padulong sa training school ang biktima, kalit na lamang siyang giharang sa lima ka wa mailhing mga suspetsado ug gitionan sa wa matinong kalibre sa armas.
Gidis-armahan sa mga suspek ang biktima sa iyang gitakin nga .45 nga pistola nga may magazine ug mga buhing bala.
“Five unidentified armed men held him at gunpoint tapos gikuha ang iyang .45 pistol,” asoy ni Limbaco dihang gihinabi sa Superbalita.
Apil pa nga gikuha sa mga suspek ang bag sa pulis. (Super Balita Davao)
Leave a Reply