Davao: Dumptruck natuwad sa Marilog, 15 nasamdan (1:30 p.m.)
MIKABAT sa 15 ka mga tawo ang nangaangol human natuwad ang ilang gisakyan nga dumptruck didto sa Marilog District, dakbayan sa Davao niadtong Biyernes sa buntag.
Ang mga biktima nga nadala ug padayong gitambalan sa Davao Medical Center nailhan sa mga pangalang Julie Cajardo 22, Junel Hunongan 18, Eugenio Lomongo 24, Stephen Apos 21, Arnel Hampit 22, Willy Lankiao 23, Rolly Babaya 20, Allan Lagnaso 29, Gyde Pinde 35, Emilio Cajardo Jr. 32, driver sa truck nga si Ricardo Lomongo 35, pulos taga-Bukidnon, Ramil Samante 23, taga-Misamis Oriental, William Dalao 47, sa Cagayan de Oro City, Danilo Lagnaso 40 ug Garry Bandago 20 nga mga taga-Calinan, siyudad sa Davao.
Nahitabo ang insidente alas 7:45 sa buntag.
Ang dumptruck nga gimaneho ni Lomongo gikan sa Bukidnon. Ang maong dumptruck padung sa Calinan karga ang pulos mga construction worker.
Apan pag-abot sa Marilog District, giingong ing-overtake ang truck sa nag-una nga sakyanan apan wa na makontrola sa drayber ang manibela hinungdan nga misarasay ug misirko ang dumptruck. (RCO/Sun.Star SuperBalita Davao)
Leave a Reply