Davao: Mga klase gisuspende (12:20 p.m.)
DALING gisuspenso kagahapon sa buntag ang tanang klase sa elementary ug high school sa mga pampubliko ug pribadong tunghaan tungod sa sayo sa buntag nga pag-ulan nga miresulta sa subling pagbaha sa mga kadalanan ug sa mga tunghaan.
Dugay ang biyahe sa mga sakyanan tungod sa traffic ug sa kahinay sa dagan gumikan sa nagbanaw nga tubig sa mga kadalanan.
Gani, ubay-ubay ka mga sakyanan ang natanggong sa mga gipangbahaan nga lugar.
Ang pagbundak sa kusog nga ulan nagsugod Lunes alas 3:30 ngadto sa alas 4:00 sayo sa buntag ug mihunong lamang kini alas 6:30.
Mga dalan sa F. Torres, Jacinto Extension corner Quirino Avenue, pipila ka bahin sa MacArthur Highway, Quimpo Boulevard, ug mga dalan sa Uyanguren maoy gilunopan pag-ayo sa tubig baha.
Base sa weather report sa Philippine Atmospheric Geophysical and Astronomical Services Administration (Pagasa), dunay Inter Tropical Convergence Zone nga nakaapekto sa Davao City ug ubang lalawigan sa Southern Mindanao.
Ang Satellite images sa weather bureau nagpakita nga napalibotan og baga nga dag-om ang Southern Mindanao.
(RCO/CPM/Sun.Star SuperBalita Davao)
Leave a Reply