Koronadal: Babaye brutal nga ginpatay (11:25 a.m.)
KORONADAL CITY — Naputos subong sang kahadlok ang mga pumuluyo, ilabi na ang mga kadalagahan, sa isa ka banwa sang probinsya sang Sultan Kudarat tungod sa presensya sang isa ka “killer” (o kun tawo nga nagapamatay).
Ini tungod ang nasambit nga killer ang ginapatihan nga may kahimoan sa tama ka brutal nga pagpatay sa isa ka 27-anyos nga babaye sa hilit nga parte sang rubber plantation sa Barangay Sto. Nino sa banwa sang Bagumbayan.
Sa report sang Bombo Radyo Marbel kahapon, ginkilala sini ang biktima nga si Grace Cinco. Nasapwan nga patay ang biktima sa talamnan sang ila rubber didto.
Base sa report, ginbuno ang biktima sang trese ka beses. Luwas sa buno, ginlaslas pa ang leog kag gin-utod pa ang duha ka mga kamot sini.
Ang pinaka-grabe pa gid, ginpanguha pa ang “joints” ( o kun mga tuway-tuway) sang mga tuhod sang nasambit nga biktima, suno pa sa report.
Sa panaysayon sang utod sang biktima, naglakat ang biktima sa ila rubber plantation sang nagligad nga adlaw kag tubtub sato, wala na ini siya nakabalik kag kadugayan, nasapwan na lamang nila ini nga patay na didto.
Ginbutyag man sini nga may nakita ini siya nga isa ka tawo nga nakasuksok sang itom nga bonnet ang guya kag nagadali nga nagalakat palayo sa ila rubber plantation. Gindugang pa sini nga may dala sang kutsilyo ang amo nga tawo nga iya nakita.(Super Balita General Santos)
Leave a Reply