Davao: 3 nabangga, 1 patay (1 p.m.)
PATAY ang usa ka 15 anyos nga batan-ong lalaki sa diha nga gisungag sa iyang gisakyang motorsiklo ang gisundan nga traysikel didto sa Matalam, North Cotabato niadtong Miyerkules sa kagabhion.
Ang kapulisan nag-ila sa biktima nga si Dennis Bernabe.
Grabe usab nga naangol ang duha ka mga kaubanan niini nga sila alyas Toto ug Inday, mga molupyo sa maong dapit.
Base sa Cotabato Police Provincial Office nasuta nga banda alas 7 sa gabii, Hunyo 18, samtang sakay ang mga biktima sa Honda Wave nga motorsiklo nga gimaneho ni Bernabe sa barangay Dalapitan, Matalam, kalit kining mibangga sa gisundan nga traysikel ug miresulta sa pagkalagpot sa mga biktima.
Dali nga gisapupo sa mga sibilyan ang mga samaron ug gidala sa Cotabato Provincial Hospital apan usa niini ang hingkabsan sa kinabuhi human nabunal ang ulo sa semento ug miliki.
Base imbestigasyon sa otoridad kusog kaayo ang dagan sa motorsiklo nga mibangga sa traysikel ug posibling naka-inom ang drayber niini. (Edgar Fuerzas/Sun.Star SuperBalita Davao)
Leave a Reply