Davao: Mag-uuma gipusil sa ig-agaw, patay (11:55 a.m.)
DAVAO CITY — Wa na gyud mabuhi pa ang usa ka 59 anyos nga mag-uuma human kini giunay pagpusil sa iya ra mismong kaugalingong ig-agaw didto sa Kiblawan, Davao del Sur.
Ang insidente nahitabo ala 1:30 sa hapon niadtong Biyernes didto sa sityo Bobong, barangay Balasiao.
Giila ni PO3 Allan Dave Parantar, imbestigador sa homicide division, ang biktima nga usa ka Leopoldo Diamona, minyo ug nagpuyo sa purok 4 sa nasangpit nga barangay.
Sumala ni Parantar nga mismong ig-agaw ra sa biktima nga nailhang si Jener Diamona, hamtong ang panuigon, minyo ug molupyo sa samang dapit maoy nagpusil sa biktima.
Matud sa kapulisan nga usa ka paltik nga 12-gauge shotgun nga giila sa lugar nga “baliuntod” ang gigamit sa suspek sa pagpusil sa biktima tumong sa nagkadaiyang parte sa iyang lawas.
Nahiagom ang biktima og 17 ka mga samad pinusilan, siyam niini sa walang bahin sa iyang lawas ug pito ka mga samad pinusilan sa tuong bahin sa iyang kamot samtang usa ka samad sab sa likod sa iyang lawas hinungdan gilayon kining namatay. (Dondon Dinoy/Sun.Star SuperBalita Davao)
Leave a Reply