General Santos: Patay’ng lalaki nakit-an (11:48 a.m.)
GENERAL SANTOS CITY — Patay na ang usa ka lalaki dihang nakit-an sa mga molupyo nga naglutaw-lutaw sa dagat didto sa Purok Sarif Mucsin, barangay Baluan alas 6:20 Biyernes sa gabii.
Matud pa ni kagawad Tupaz, opisyal sa nahisgutang barangay nga dungan sa kusog nga pagbundak sa ulan, mabulabog ang mga katawhan nga nagpuyo daplin sa baybay tungod nakit-an ang lawas sa lalaki nga naghayang nga wala nay kinabuhi.
“Bali nakit-an kana sa mga residente dinhi nga naglutaw-lutaw ang iyang lawas. Tungod sa kakusog sa ulan, nagtuo mi nga basin kini mananagat nga nalumos lang kay kusog man usab ang balud niadtong tungura. Amo kining gipaabot sa kapulisan ug ilang nakuha ang patay’ng lawas sa lalaki nga gibana-bana namo tulo na ngadto sa upat ka adlaw nga patay tungod duna nay laing baho ang lawas,” matud pa ni Tupaz.
Mga personahe sa Labajo Funeral Homes maoy nagbira sa patay’ng lawas sa lalaki aron kini makuha samtang naglutaw-lutaw apan nalisdan sila sa pagkuha tungod kay hinay-hinay nang naagnas ang iyang panit human nahumol sa parat nga tubig. (Mel Coronel/Sun.Star SuperBalita General Santos)
Leave a Reply