Sun.Star Breaking News

NAG-ATUBANG og dakong problema ang mga opisyal sa Sarangani Province kung unsaon pagsulbad ang kadaot sa bagyong Frank human upat ka mga munisipyo ang naapektuhan.

Kapin sa singkwenta ka mga pamilya ang namakwit ngadto sa mga evacuation center tungod kay nangaguba ang ilang mga bay apil na ang paglapaw sa tubig sa ilang mga kanal ug suba hinungdan nga daghang mga panimnalay ang nangaanod.

Mga tulay nangaguba sab tungod sa pagbundak sa kusog nga ulan niadtong Biyernes ug Sabado.

Matud sa mayor sa maong lungsod nga duha ka mga bata ang kompermadong patay sa iyang lungsod human natumbahan og lubi sa barangay Lumoyon.

“Dili pa namo masulti kung pila gyud ang danyos sa among lungsod, apan dako ang akong pagtuo nga dako-dako kini tandi sa miaging mga bulan nga kami usab giulanan og kusog, duha ang patay pero kadto natumbahan sa lubi apan ako nang gipalihok ang akong mga tawo aron tabangan ang mga pamilya,” matud ni Mayor Rom Falgui.

Samtang sa Maitum Sarangani Province daghang mga tulay usab ang dili na maagian tungod kay nangaputol ug daghang mga molupyo usab ang namakwit tungod sa kahadlok nga basin maapil sa ilang mga bay nga maanod tungod sa ulan.

Si Mayor Elsi Peret sa Maitum, mihatag na og mga sinakong bugas sa ilang mga evacuation center aron adunay makaon ang ilang mga lomolupyo nga nagtapok sa usa ka lugar.

Sa Alabel, mokabat na ngadto sa 583 ka mga pamilya ang nagtapok karon sa ilang Municipal Gym nga gikan sa ubang mga barangay tungod apektado usab sa pagbundak sa ulan nga dala ni bagyong Frank.

Sa Maasim, wala na gitugtan ang mga dagkong sakyanan nga makasulod sa Seguil Bridge tungod kay duna nay porsiyon nga hapit na maputol gumikan sa baha sa suba. (Mel Coronel/Sun.Star SuperBalita General Santos)

Bisaya, Top stories