Maguindanao: 14 patay, 11 nangawala tungod sa baha (12:25 p.m.)
KATORSE (14) na ang patay samtang 11 ang nangawala sa pagbaha didto sa Central Mindanao gumikan sa padayong pag-ulan pinisik sa bagyong Frank nga miigo sa nasud.
Mikabat 12 ka tawo ang hingkabsan sa kinabuhi didto sa barangay Kuya, South Upi, Maguindanao Province, napulo ang missing sa diha nga alas 4:00 sa kabuntagon, Hunyo 21, gibanlas sa makusog nga tubig-baha ang pinuy-anan sa mga biktima kilid sa dakong sapa.
Usa usab ang napatay sa barangay Dado, Alamada, North Cotabato human misulay kini sa pagtabok sa suba ug naabtan sa makusog nga bul-og sa tubig.
Upat ka mga tawo ang nangasangit sa mga punoan sa kahoy nga dali hinuong natabangan sa mga sakop sa 505 rescue team sa Cotabato Provincial Disaster Coordinating Council samtang usa usab sa siyudad sa Cotabato.
Minilyon karon ang danyos sa mga pananom, kahayopan ug mga infrastructure project sa kagamhanan nga giigo sa kalit kaayo nga kalamidad samtang liboan ka mga pamilya ang mihiklin sa mga luwas nga dapit.
Apektado usab ang dagan sa trapiko sa Cotabato-Davao Highway sa diha nga miawas ang tubig sa Reo Grande De Mindanao ug Liguasan Marsh, diin naglisod ang mga sakyanan sa pag-agi apil na sa nahitabong landslide ug mga nangatumba nga punoan sa kahoy sa kalsada. (Edgardo Fuerzas/Sun.Star SuperBalita Davao)
Leave a Reply