Sarangani: 34 milyon ka pesos ang danyos sa baha (3:19 p.m.)
ANG Provincial Disaster Coordinating Council (PDCC) nagpagula na og talaan sa mga lungsod sa Sarangani nga naigo sa kusog nga baha ug pagdahili sa yuta tungod sa bagyong Frank.
Matud ni Carmelo Latoja, action officer sa PDCC, nga upat ka mga lungsod ang naigo sa kalamidad hinungdan nga sila mihimo og usa ka resolution nga ipasa sa Sangguniang Panlalawigan aron makadeklara ang probinsiya ubos sa state of calamity.
Sa katibuk-an moabot ngadto sa 1,775 ka mga pamilya ang apektado sa bagyo sa upat ka mga lungsod sa Maitum, Kiamba, Maasim ug sa Alabel.
Sa Alabel dunay 661 ka mga pamilya ang anaa sa evacuation center karong panahona. Ang bagyo nagguba sa mga kabtangan sa maong lugar nga balor og 10.5 milyones pesos.
Sa Maasim, mikabat ngadto sa 312 ka mga pamilya ang naapektuhan sa baha ug pagdahili sa yuta diin moabot ngadto sa 9.4 milyones pesos ang mga kabtangan ang nangadaot.
Sa Maitum moabot usab sa 288 ka mga pamilya ang nawad-an og panimalay human gibanlas sa tubig baha ug mikabat ngadto sa 10 milyones pesos ang danyos samtang sa Kiamba moabot usab sa 514 ka mga pamilya ang anaa karon sa evacuation center.
Duha ka mga menor de edad ang nangamatay sa barangay Lumuyon human natumbahan og lubi. (Mel Coronel/Sun.Star SuperBalita General Santos)
Leave a Reply