Sun.Star Breaking News

LIMA ang patay ug upat ang nangawala sa paglunop didto sa Lebak, Sultan Kudarat Province.

Ang Local Government Unit sa Lebak miingon nga banda alas 7:00 sa kabuntagon niadtong adlaw nga Dominggo nakit-an sa mga sibilyan ang lima ka tawo nga nasangngit sa mga gamot sa kahoy kilid sa dakong suba.

Tulo niini babaye, usa ang buntis ug duha ang lalaki nga pulos wala nay kinabuhi.

Matud sa imbestigasyon sa kapulisan posibli ang mga biktima gikan sa bukid nga parte sa Lebak nga gibanlas sa makusog nga pagbaha gumikan sa grabeng pag-ulan, pinisik sa bagyo nga miigo sa nasud.

Moabot usab sa dul-an lima ka milyon ka pesos ang damyos sa baha sa Lebak sa mga pananom, kahayupan, mga personal nga kagamitan, inprastraktura, ilabina sa mga pungong nga nangaguba sa makusog nga tubig baha.

Duha usab ang patay ug pito ang missing sa pagbaha sa Guindulungan, Maguindanao Province.

Ang kapulisan nag-ila sa mga hingkabsan sa kinabuhi nga sila Azmirrah Umbal, 27 ug ig-agaw niini nga si Kamir Hassan, 18, samtang pito sa mga silingang niini nangawala.

Subay sa taho gikan sa Maguindanao Police Provincial Office nasuta nga banda alas 9:00 sa kagabhion niadtong Dominggo samtang nangatulog ang mga biktima sa ilang pinuy-anan kilid sa Tambunan River sa Guindulungan, kalit naghagunos ang makusog nga baha.

Ang uban nakabantay hinungdan nga nanagan kini paingon sa luwas nga dapit.

Apan ang mga biktima nahinanok sa pagkatulog hinungdan nga apil kini sa ilang bay nga gidala sa makusog nga tubig baha.

Nakit-an ang mga patay nga lawas nga naglutaw duol na sa Liguasan Marsh samtang pito ang missing nga padayong gipangita sa militar ug kapulisan.

Gipamahayag ni Mayor Datu Midtimbang nga 14 ka bay sa iyang munisipyo nga gianod sa baha samtang minilyon ang damyos sa mga kabtangan, kahayupan, pananom ug mga proyekto sa kagamhanan. (Edgar Fuerzas/Sun.Star SuperBalita Davao)

Bisaya