Davao: Kagawad gibugha (11:59 a.m.)
Rex C. Otero
DAVAO CITY — Laing krimen nahitabo sa Nabunturan, Compostela Valley Province nga gipahid na usab ngadto sa grupo sa New People’s Army (NPA).
Niining bag-o lang, mao ang pagpusil patay sa kagawad sa barangay Mipangi. Nahitabo ang insidente alas 8:30 sa buntag niadtong Biyernes nga gikamatay sa biktimang si Kagawad Noli E. Llanos, 48 anyos, minyo.
Ang taho sa militar nagbutyag nga gipatay ang biktima sa duha ka mga gikatahapang sakop sa Special Partisan Unit (Sparu) sa NPA.
Nasayran sa pasiunang imbestigasyon sa Nabunturan police station nga ang biktima padulong unta motambong sa sesyon sa barangay niadtong tungora.
Apan pag-abot sa national highway sa barangay Mipangi samtang nagbaktas, duha ka mga armado nga nagsakay sa blue nga Honda XRM motorcycle mitapad ug mipusil sa biktima sa makadaghang higayon nga misangko sa iyang hinanaling kamatayon.
Human sa hitabo, mga suspek mipasirit sa ilang motor padung sa direksyon sa Mawab human nila gisakmit ang .357 nga armas sa kagawad.
Nasayran nga ang biktima kanhi miyembro sa NPA hangtud nga mibalik sa sabakan sa balaod ug nahimong opisyal sa barangay ug aktibo sa pagpatuman sa mga proyekto sa kagamhanan. (RCO/Sun.Star SuperBalita Davao)
Leave a Reply