General Santos: Nagmaoy napatay (12:17 p.m.)
Ni Mel Coronel
GENERAL SANTOS CITY — Kapitan sa barangay Conel ning dakbayan sa General Santos gitudlong nakapusil patay sa usa ka 30 anyos human kini nagmaoy samtang girespondihan sa mga barangay opisyal alas 9, Biyernes sa gabii.
Ang kapulisan sa San Isidro Police Station nag-ila sa biktima nga si Evecer Manaya, minyo, molupyo sa purok 6 sa maong barangay samtang ang barangay kapitan nga nakapusil patay mao si Jose Santos.
Sa imbestigasyon nga gihimo sa kapulisan nga nagmaoy ang biktima sa usa ka imnanan uban sa iyang barkada nga nailhan nga si Jurias Amper. Matud pa nga wala magkasinabot ang duha nagsinuklianay pa sila sa ilang mga kinumo, hinungdan nga nangayo og tabang sa ilang mga opisyal sa barangay ang inahan sa biktima.
Daling girespondihan ang kagubot uban ang kapitan sa barangay, apan luyo sa pagpaningkamot sa mga opisyal nga maukang ang sumbaganay nagpabuto sa armas si Santos sa ibabaw isip warning shot aron moundang hitabong sumbaganay sa duha tungod dili kini maduolan tungod dunay hinagiban ang 30 anyos nga nagmaoy.
Migawas sa imbestigasyon nga nasuko ang biktima sa pagpabuto og armas sa ilang kapitan hinungdan nga ang kapitan na sab ang gigukod sa biktima ug didto na nahitabo nga wala nay nahimo ang kapitan iya na lang gipusil ang biktima tungod hapit na maabtan sa lalaking nagdala og kutsilyo aron siya lubaon. (Mel Coronel/Sun.Star SuperBalita General Santos)
Leave a Reply