Davao: MILF, military manghinlo (10:16 a.m.)
GIPADAPLIN una ang bangi, ang Moro Islamic Liberation Front (MILF) ug militar nagkahiusa nga magtinabangay sa pagpanghinlo sa Rio Grande de Mindanao.
Gipamahayag ni Cotabato City Mayor Muslimin Sema nga personal nga miadto sa iyang buhatan ang mga opisyal sa MILF ug mitanyag kini nga magpadala sa ilang gatusan ka mga miyembro nga mobulig sa pagbungkag sa pito ka ektaryang waterlily nga mibabag sa Delta bridge hinungdan sa pag-awas sa tubig sa pinakadako nga suba sa Mindanao.
Ang pag-awas sa tubig maoy hinungdan sa grabeng pagbaha sa siyudad sa Cotabato ug mga silingang dapit.
Giklaro ni MILF Civil Military Relations chief Eid Kabalu nga dili magdala og mga armas ang ilang mga sakop kun di pala, piko ug sundang nga gamiton sa pagkuha sa mga waterlily nga nagtapok tunga-tunga sa Rio Grande de Mindanao maoy ilang bitbiton.
Moabot usab ang gatusan ka mga sundalo gikan sa 6th Infantry Division Philippine Army ubos sa kamandoan ni Major General Raymundo Ferrer nga motabang usab sa bayanihan system nga gipanawagan ni Mayor Sema. (Sun.Star SuperBalita Davao/Sunnex)
Leave a Reply