Cagayan de Oro: 80 anyos ‘gipatay’ sa awas (3:31 p.m.)
CAGAYAN DE ORO CITY — Nakabsan sa kinabuhi ang usa ka lola human gipatay sa kaugalingong awas niadtong Lunes mga alas 5:00 sa hapon sa Kiaw-as, Barangay Napaliran, lungsod sa Balingasag, Misamis Oriental.
Si SPO1 Howard Lagsa sa Police Station 3 (PS3) sa Agora niila sa biktima nga mao si Visitacion Jugay, 80, minyo, nagpuyo sa susamang dapit.
Ang suspetsado nailhang si George Tamba, 31, minyo, lumad nga taga Carcar, siyudad sa Cebu ug kasamtangan nagpuyo sa susamang dapit.
Sa gihimong pakighinabi sa Sun.Star SuperBalita ngadto kang PO1 Reagan Penaflor sa Police Station 3 sa Agora siya niingon nga kasamtangang nadetinar si Tamba sa PS3 tungod sa pagkasapon niini sa Agora terminal sa planong paglayas niini.
Nasayran nga hubog si Tamba sa alas 5:00 sa hapon dihang nadungog niini si Jugay nga nagyawyaw ug nagsaba-saba kabahin niya.
Tungod sa kalagot ni Tamba ug sa kasaba sa iyang ugangan, iya kining gipainom og gas ug wala pa gayud siya nakuntento iya pa gayud kining gisipa hinungdan nga nangabali ang bukog sa biktima diin nasaksihan gayud sa mga silingan.
Gibati og kahadlok ang suspetsado human sa iyang nahimo, hinungdan nga dali kining mikuha og sundang dayong sibat sakay og bus paingon ning siyudad sa Cagayan de Oro. (SuperBalita Cagayan de Oro/Stephanie S. Viovicente)
Leave a Reply