Davao: Gi-torture wa mailhi (3:21 p.m.)
DAVAO CITY — Duha ka adlaw na ang milabay apan nagpabilin gihapon nga wa mailhi ang lalaki nga giayo og torture ug gilabay sa kasagbutan sa Lower Mahayag, Bunawan, dakbayan sa Davao.
Sa pakisusi sa SuperBalita Martes sa Rivera Funeral Homes sa Licanan, Lasang, nasayran nga wa gyuy mipatim-aw nga tagtungod sa biktima.
“Wala pa gyuy nag-claim,” matud ni Jay Rivera, staff sa punerarya.
Bisan si PO3 Mariano Operario, imbestigador sa Bunawan police station, kagahapon nagkanayon nga wa pa sila’y lead sa imbestigasyon bisan sa identity sa gipatay.
“So far, wala pa man gyuy nianhi sa station or didto sa punerarya,” sumala ni Operario.
Hinuon, daan nang nagsulti ang pulis nga hayan dili taga-Bunawan ang biktima ug igo lang kining gilabay sa maong dapit gumikan kay bisan usa sa dapit wa gyuy nakamay-ong kaniya.
Nagpabilin pa sa Rivera ang biktima nga gihulagway’ng 30 anyos kapin ang pangedaron, taas og buhok, tama-tama lang ang lawas, brown ang pamanit ug nagsul-ob og itom nga t-shirt ug camouflage nga short pants.
Ang biktima naputos sa mga lawom nga samad dinunggaban sa nagkadaiyang bahin sa lawas, gituok ang liog og electrical wire samtang gilikosan og masking tape ang iyang tibuok dagway. (RCO/Sun.Star SuperBalita Davao)
Leave a Reply