General Santos: Gasolinahan naugdaw (3:10 p.m.)
UGDAW ang usa ka gasolinahan sa Caltex human nga gilamoy og kalayo sa Cannery road, Sanchez subdivision, alas 12 sa udto, Dominggo.
Mga sakop sa Bureau of Fire Protection miresponde sa nasunog nga establishmento apan nalisdan sa pagpalong sa kalayo.
Ang kalayo nagsugod sa opisina nga puno og mga baligyang mga engine oil.
Gibanatan sa mga bombero og bubo og tubig ang kisame padulong sa atop sa kasikbit nga atop aron dili molatay sa pikas building diin nahimutang ang unom ka mga pump machine.
Apil nga nakigkombati sa sunog ang mga bombero nga gikan sa kompanyang Dole Philippines, Tupi, South Cotabato, ug mga fire volunteer sa Chinese Chamber of Commerce sa dakbayan sa General Santos.
Usa ka oras ang milabay una napalong ang kalayo.
Kanhi gipanag-iyahan ang gasolinahan sa mga drayber ug operator sa mga depasaherong jeep sa lungsod sa Polomolok apan bag-ohay pa lang napalit sa Dolefil Employees Cooperative Complex (DECCO) nga kasamtangang nagdumala sa gasolinahan.
Walay naangol sa sunog. (Mel Coronel/Sun.Star SuperBalita General Santos)
Leave a Reply