Gensan: 12 anyos gitago sa engkanto? (4:30 p.m.)
Ni Mel Coronel
GENERAL SANTOS — Usa ka 12 anyos nga nahanaw giingong gitagoan sa engkanto, sumala sa usa ka arbularyo kinsa misusi sa nahitabo sa bata human midangop kaniya ang pamilya.
Si Lola Pasit, iladong manghihilot ug mananambal sa Barrio Obrero, Barangay Dadiangas North ning dakbayan sa General Santos, nagtug-an sa Superbalita ug dxMD RMN Radyo Gensan nga ang magtiayong Reyes maoy midangop aron masayran ang kahimtang sa 12 anyos.
“Niduol sila sa akoa, gihimo nako ang tanan kutob sa akong mahimo sa pagtabang. Ang 12 anyos mikuyog sa iyang classmate, apan ang problema karon kay dili tawo ang iyang gikuyogan kundi usa ka engkanto, wala siya masayod nga wala na diay siya makauli sa ilang panimalay, wala siya mamatay naa lang sa ilang lugar sa Barangay Labangal,” matud sa mananambal.
Kahinumduman nga hangtud karon wala pa gihapon makauli sa ilang panimalay gikan sa pagtungha sa Saway Labangal Elementary School ang biktima nga si Donnaville Reyes, molupyo sa Dona Soledad subdivision, sakop sa Barangay Labangal. Siya nawala sukad pa niadtong Septyembre 26. (Sun.Star SuperBalita General Santos/Sunnex)
Leave a Reply