General Santos: 6 bata nahilo (2:33 p.m.)
Ni Mel Coronel
GENERAL SANTOS — Unom ka mag-agaw gipangdala sa General Santos City Hospital human nangahilo kay mikaon sa liso sa tuba-tuba sa SACI compound, lungsod sa Alabel, Sarangani Province, alas 4 sa hapon, Huwebes.
Mga biktima nailhan nga sila si Lalyn, 4; Daisa, 6; Armylene 5; Rhea Mae, 8; Rosemae, 7 ug Amy rose, 5; ( Mga apelyido gitago kay mga menor de edad), dungan nga gidala sa ospital tungod sa pagsuka ug pagpanakit sa ilang mga tiyan.
Matud ni Clirita, apohan sa mga bata, nagdungan og reklamo ang iyang mga apo tungod sa pagpanakit sa ilang mga tiyan human nga nangaon og liso sa tuba-tuba sa pagtuong makaon susama sa mani.
“Nagdungan sila og abot sa among panimalay unya ilang gireklamo ang pagpanakit sa tiyan, akong gipangutana kung unsay nahitabo sa ilaha, didto nako nasayran nga nakakaon diay sila og liso sa tuba-tuba kay mao may gisulti sa usa nako ka apo,” matud sa apohan.
Wala maglangan si Clirita nangayo og tabang sa mga silingan ug gipangdala ang mga bata sa ospital aron madapatan og tambal. Sa kasamtangan obserbahan pa sa mga mananambal sa pipila ka adlaw ang mga bata. (Super Balita General Santos)
Leave a Reply