Sun.Star Breaking News

ni Abigail C. Malalis

GITUOHANG usa ka hired killer ang brutal nga nipatay sa usa ka babayeng kagawad niadtong nilabayng adlaw sa Sagay, Camiguin Province.

Sa gihimong pakighinabi sa dxIF Bombo Radyo ngadto kang Gov. Gigi Romualdo sa isla sa Camiguin, nasayran nga una nang nangayo og pakitabang ang biktima nga si Antonia Ubsid Cuizon kaniya aron mapasakaan og kaso ang iyang kanhing bana nga nailhang si Joveniano Cuizon human nasuta sa biktima nga nagpakasal kini sa laing babaye sa Cebu.

Matud ni Gov. Romualdo, niadtong Disyembre sa milabayng tuig miduol na usab kaniya ang biktima aron sa pagpakitabang sa iyang pamasahe padulong sa Manila diin gisang-at ang kaso batok sa iyang bana.

“Katapusan na kuno nga hearing sa iyang kaso karong February ug ipakanaog na ang hukom batok sa iyang bana,” matud ni Gov. Romualdo.

Upat ka mga kaso ang gipasang-at sa biktima batok sa iyang bana ug lakip niini ang bigamy, perjury ug abandonment.

Nasayran nga seaman ang bana sa biktima human kini niya gipa-eskwela.

Apan human sa pila ka katuigan, wala na kini mipauli kaniya human nga nakasakay sa barko nga nagbiyahian gawas sa nasud ug giingong giabandona niini ang iyang pamilya.

Sa nakuhang certified true copy nga papeles sa biktima nga nagpamatuod nga nakigminyo og laing babaye ang iyang bana ug adunay duha ka mga anak ug giingong gipagawas niini nga siya ulitawo.

Tungod niini, gisumbong sa biktima si Joveniano ngadto sa Makati Trial Court diin napriso gayud ang suspetsado.

Apan tungod kay nakapiyansa kini, nagpabilin siyang gawasnon ug maoy gituohang mastermind sa pagpatay sa iyang asawa.

Nakaangkon og walo ka samad dinunggaban ang biktima gamit ang ice pick ug gipusil pa gayud kini sulod mismo sa iyang panimalay nga maoy gituohang hinungdan sa iyang kamatayon.

Nadala pa sa tambalanan ang biktima apan patay na.

Giingong kauban sa biktima ang iyang anak nga 17 anyos dihang niabot ang tulo ka mga suspetsado sakay sa habal-habal sa ilang balay.

Nasayran nga niadtong bulan sa Disyembre nakita na sa maong dapit ang mga suspetsado nga gituohang nag-monitor na kini.

Nihimo pa ang kapulisan sa Camiguin og makuti nga imbestigasyon aron pag-ila sa mga suspetsado. (Sun.Star Superbalita Cagayan de Oro)

Business