Davao: Driver naanod (3:23 p.m.)
ni Edgardo Fuerzas
PATAY ang usa ka traysikel drayber human naanod sa tubig-baha didto sa Magpet, North Cotabato.
Ang biktima giila sa kapulisan nga si Marciano Almadilla, 60, minyo ug molupyo sa nasangpit nga lugar.
Sa taho gikan sa Cotabato Police Provincial Office nasayran nga alas 7:00 sa gabii niadtong Lunes samtang mitabok sa sapa sa Barangay Matas, Magpet si Almadilla pauli sa ilang pinuy-anan gikan namasahero kalit lang nga mibulwak ang kusog nga tubig-baha.
Tungod sa kalit nga insidente ang biktima wala na makahimo pa sa pagluwas sa iyang kaugalingon ug gilayon nga gi-anod sa tubig-baha.
Dali nga milusad og search and rescue operation ang kapulisan, militar ug lokal nga opisyal pinangulohan ni Mayor Efren Piñol.
Didto na nakita ang patay’ng lawas sa biktima sa Barangay Alegria, President Roxas, Cotabato, nga nasangit sa dakong gamot sa usa ka punuan.
Mokabat na sab sa 20 ka pamilya ang namakwet paingon ngadto sa luwas nga dapit human nalunupan ang ilang mga panimalay samtang laing tulo niini ang giguba sa baha.
Milihok na sab si Cotabato Governor Jesus Sacdalan aron kahatagan og ayuda ang mga biktima sa maong kalamidad.
Sigun sa Pagasa hinungdan sa pagbaha didto sa Central Mindanao mao ang padayon nga pag-ulan dala sa di maayong lakat sa panahon nga miigo sa isla sa Mindanao.(Sun.Star Superbalita Davao)
Leave a Reply